Meta estrea un novo xeito de crear e descubrir vídeos feitos con IA

Meta deu a coñecer hoxe unha nova funcionalidade da súa aplicación de intelixencia artificial: Vibes, un espazo pensado para descubrir e crear vídeos curtos xerados por IA. A compañía está a estrear esta opción de forma experimental tanto na aplicación de Meta AI como en meta.ai, co obxectivo de facilitar a exploración creativa e ofrecer novas posibilidades de expresión audiovisual.
O novo apartado funciona como un fío de inspiración no que os usuarios poden atopar unha selección de vídeos producidos con ferramentas de IA por distintos creadores e comunidades. O contido adaptarase progresivamente aos gustos de cada quen, e cando algo esperte interese será posible tanto elaborar unha peza propia desde cero como reutilizar un vídeo existente, engadindo imaxes, música ou modificando o estilo para darlle un toque persoal.
Unha vez rematada a creación, o vídeo poderá compartirse directamente no fío de Vibes, enviarse por mensaxes privadas ou publicarse en Instagram e Facebook, tanto en Stories como en Reels. Ademais, se un usuario se atopa cun vídeo de Meta AI en Instagram, poderá premer nel para abrir a aplicación de Meta AI e remexelo ao seu gusto.
Meta adianta tamén que está a traballar con artistas visuais e creadores para desenvolver ferramentas de produción máis potentes, que se incorporarán progresivamente a Vibes nos vindeiros meses.