Meta pagará 91 millóns de euros por descoidar a súa seguridade

A autoridade irlandesa de protección de datos (DPC) vén de anunciar a súa decisión final de impor a Meta unha sanción de 91 millóns de euros por mor dun proceso iniciado en abril de 2019 no que se denunciaba á compañía de Mark Zuckerberg de almacenar contrasinais de usuarios en texto plano dentro dos seus sistemas interno, o que supón un claro desleixamento e vulneraría o Regulamento Xeral de Protección de Datos (GDPR) europeo.
Meta comunicara á DPC este incidente en marzo de 2019, aínda que en abril descubriron que o fallo na súa seguridade era peor do que detectaran e, pese a que non hai evidencias de que se abusase dos datos dos usuarios, é algo difícil de detectar, xa que máis de 20 mil traballadores de Facebook tiveron acceso aos contrasinais de entre 200 e 600 millóns de usuarios durante bastantes anos (o problema podería ter comezado en 2012).