Meta presenta o modelo de síntese de voz mediante IA máis versátil até o momento

venres, 16 de xuño do 2023 Marcus Fernández

Aínda que nos últimos meses dáse a entender que a guerra polo mercado da intelixencia artificial está protagonizado por OpenAI/Microsoft e Google, non podemos esquecer que Meta xoga un papel moi importante, contribuíndo significativamente aos modelos de linguaxe en proxectos independentes, e para deixar claro o seu bo facer neste eido presentan Voicebox, o sintetizador de voz mediante intelixencia artificial máis versátil até o momento.
Voicebox pode producir pezas sonoras de alta calidade e editar son pregravado para, por exemplo, eliminar ruídos molestos preservando o contido e o estilo do son orixinal. Amais, este modelo é multilinguaxe (funciona en inglés, francés, alemán, polaco, portugués e español).
Esta tecnoloxía no futuro poderá empregarse para dar voces naturais a asistentes virtuais, para que as persoas con eivas visuais escoiten o que escriben os seus amigos coa súa propia voz xerada por IA e incluso dar grandes posibilidades aos creadores de contido para crear e editar pistas sonoras dos seus vídeos. Tamén poderá axudar a que as persoas poidan comunicarse verbalmente coas súas propias voces aínda que falen distintos idiomas.
Cómpre salientar que dende Meta son conscientes do perigo desta tecnoloxía, que pode empregarse con malas intencións (por exemplo, para suplantar a alguén e realizar calotes), de aí que sexan transparentes con desenvolvemento desta tecnoloxía, manténdose abertos aos debates sobre o uso responsable da intelixencia artificial.

PUBLICIDADE