Microsoft Ibérica nomea a Bárbara Olagaray directora de Relacións Institucionais e da Área Legal
xoves, 18 de febreiro do 2010
Bárbara Olagaray Gatto, unha
licenciada en Dereito pola Universidade Iberoamericana que conta con máis de 20
anos de experiencia profesional como conselleira legal e asesora xurídica tanto
en organismos públicos como en firmas privadas, vén de ser nomeada por
Microsoft Ibérica como directora de Relacións Institucionais e da Área Legal da
compañía, un posto onde poderá aplicar os seus amplos coñecementos de dereito
empresarial e entorno xurídico.
Dende este novo posto,
Olagaray desempeñará un dobre labor: por un lado liderará o establecemento e
desenvolvemento da estrutura de programas dirixidos á regulación e defensa
legal de Microsoft Ibérica, garantindo asemade o cumprimento das políticas de
bo goberno corporativo da filial; e por outra banda, na súa faceta de
responsable de Relacións Institucionais, Bárbara será a encargada de coordinar
todos aqueles plans e iniciativas da compañía encamiñados a potenciar o compromiso
do fabricante de software cos actores fundamentais do panorama socioeconómico
local.
Neste campo de
responsabilidade, será a voz de Microsoft na defensa conxunta, xunto con
entidades públicas e privadas, dos valores que garanten un entorno axeitado
para impulsar a innovación no terreo do software, tales como a defensa da
propiedade intelectual, a aposta pola interoperabilidade ou a preservación da
seguridade e a privacidade nas novas tecnoloxías.
