Microsoft achega tecnoloxías de aprendizaxe máquina para salvar aos elefantes dos cazadores
venres, 10 de agosto do 2018
Poden
as novas tecnoloxías, e máis polo miúdo as máquinas con
capacidade de aprender, salvar aos elefantes da extinción? Se
atendemos ao que conta estes días Microsoft, reflectindo datos
xerados polo seu proxecto Conservation Meetrics, a resposta á
devandita pregunta é positiva. Este dato esperanzador chega se
cadra no intre en que máis se precisaba: agora que a extinción
semellaban máis que inevitábel (debido sobre todo á caza derivada
da extracción do marfil, e da permisividade dos países e os
mercados con este comercio, mesmo dos países e mercados máis
supostamente avanzados).
O
proxecto ten a súa cerna na República do Congo, onde se está a
xerar Big Data sobre os elefantes a raíz da iniciativa
Elephant Listening Project. Para xuntar a meirande cantidade de
datos, fixáronse sensores acústicos na contorna dos devanditos
animais que fican activos as 24 horas do día. Estes sensores
capturan tódolos sons do Parque Nacional de Nouabalé-Ndoki e das
zonas forestais limítrofes.
Recóllese
a actividade acústica de fauna e flora, pero tamén da acción
humana, por exemplo ruído de motoserras, motores, voces humanas e
disparos. Asemade, cáptase o son xerado polos elefantes de selva
africanos, unha especie en “grave perigo de extinción”, segundo
lembra a multinacional Microsoft, que quixo participar na loita pola
súa supervivencia co devandito proxecto Conservation Meetrics,
iniciativa abeirada a AI for Earth, traducíbel por Intelixencia
Artificial para a Terra.
A
compañía está a poñer en xogo os seus últimos avances en Machine
Learning (ML), en galego Aprendizaxe
Máquina, co obxectivo de facer seguimento da vida salvaxe
africana e analizar os resultados dos traballos de conservación.
Máis polo miúdo, empréganse algoritmos avanzados para desenvolver
e impulsar Elephant Listening Project en colaboración coa
Universidade de Cornell, onde se encargan de distinguir o bruar dos
elefantes de selva africanos do resto de sons típicos dun bosque
tropical.
“É
un traballo perfecto para un sistema de Intelixencia Artificial, que
ao ser humano levaríalle anos buscando patróns entre terabytes de
datos”, lembra Microsoft, engadindo que estes patróns sérvenlles
aos investigadores para estimar a poboación de animais, facer
seguimento dos seus movementos, garantir a súa seguridade e
identificalos de xeito individual, algo que até o de agora era unha
tarefa inviábel, tendo en conta a contorna natural na que se moven.
Ademais,
os traballos inclúen utilizar Machine Learning
para achar pautas e rutinas de movemento en tempo real que alertan da
chegada de cazadores furtivos ou bloquear anuncios en liña sobre a
comercialización de marfil.
O
proxecto Elephant Listening Project leva máis de tres décadas
investigando como os elefantes utilizan sons de baixa frecuencia para
comunicarse entre si. Recentemente, eses científicos comezaron a
utilizar sensores acústicos para construír estimacións de
poboación e, en última instancia, para rastrexar e protexer aos
elefantes en África Central e Occidental.
Conservation
Meetrics comezou a colaborar co Elephant Listening Project en 2017
para impulsar a súa eficiencia.