Microsoft anuncia importantes avances en computación cuántica

Levamos un tempo escoitando falar da computación cuántica coa promesa de que suporá toda unha revolución cando consiga unha escala que parecía distante, e que Microsoft di que está máis preto de facerse realidade grazas ao seu novo desenvolvemento: a unidade de procesamento cuántico (QPU) chamada Majorama 1, que asegura ser a primeira impulsada por un núcleo topolóxico, deseñada para escalar até un millón de cúbits nun único chip.
Paralelamente Microsoft dá conta da publicación na revista Nature dunha investigación que demostra a capacidade para aproveitar un novo tipo de material (o primeiro topocondutor do mundo) para desenvolver un tipo de cúbit radicalmente diferente, pequeno, rápido e controlado dixitalmente; así como tamén asegura estar no bo camiño para construír o primeiro prototipo tolerante a fallos (FTP) baseado en cúbits topolóxicos para un ordenador cuántico escalable.
Estes anuncios xuntos darían a entender que estamos nun grande momento para a computación cuántica, pois nos vindeiros meses podería dar un salto importante grazas aos últimos avances froito de preto de dúas décadas de investigación por parte de enxeñeiros de Microsoft.