Microsoft aposta pola IA no seu congreso para desenvolvedores

martes, 23 de maio do 2023 Marcus Fernández

No marco do evento Microsoft Build 2023 a compañía de Redmond anunciou máis de 50 produtos e novas funcionalidades, das que a meirande parte implican o uso da intelixencia artificial, que é o eixe no que pivotan os traballos de Microsoft atendendo á actual demanda do mercado e o grande potencial desta tecnoloxía.
Microsoft anunciou que adoptará o mesmo estándar de plugin aberto que OpenAI introduciu en ChatGPT, permitindo a interoperatibilidade entre ChatGPT e a ampla oferta de tecnoloxía de copilotos de Microsoft, polo que os desenvolvedores poderá utilizar unha plataforma para crear engadidos que operen en ChatGPT, Bing, Dynamics 365 Copilot e Microsoft 365 Copilot. Dentro desta novidade tamén estaría a chegada de Bing a ChatGPT, de xeito que o popular chat de intelixencia artificial poderá utilizar o buscador de Microsoft para conseguir respostas máis actualizadas.
Outra novidade importante para o mundo da empresa é a nova plataforma de análise unificada Microsoft Fabric, que inclúe enxeñaría, integración, almacenamento e ciencia de datos, analítica en tempo real, capacidade de observación aplicada e enxeñaría empresarial, todo conectado a un único almacén de datos chamado OneLake. Deste xeito os clientes de todos os niveis técnicos poderán experimentar as capacidades desta nova solución nunha ferramenta unificada, desbloqueando o potencial dos seus datos e facilitando aos desenvolvedores o poder da IA xenerativa para atopar intelixencia nos seus datos.
Para o público xeral, por outra banda, o máis interesante sería a chegada de Windows Copilot a Windows 11, ou sexa, que o asistente de intelixencia artificial que Microsoft integrou no seu navegador web Edge chegará ao propio sistema operativo na versión preliminar que estará dispoñible en xuño.

Microsoft integrará un copiloto de intelixencia artificial en Windows 11

PUBLICIDADE