Microsoft comercializa mandos de Xbox personalizados

A personalización de cores en produtos como zapatillas deportivas ou smartphones de Motorola ten demostrado funcionar moi ben para crear obxectos únicos e rechamantes que resulten moi atractivos para o usuario ao poder reflectir a súa personalidade, e Microsoft tamén quere ofrecer algo semellante aos xogadores de Xbox One, polo que ten xa dispoñible para EE.UU., Canadá e EE.UU. o Xbox Design Lab, servizo que permite personalizar un mando sen fíos de Xbox para recibilos en 14 días laborables na casa tras a súa encarga.
O sistema permite elixir as cores do corpo, os gatillos e botóns frontais, a cruceta dixital, os sticks, os botóns e a parte traseira do mando, de xeito que teriamos máis de 8 millóns de combinacións dispoñibles, custando cada mando 79,99 dólares só coa personalización cromática e 89,98 dólares incluíndo o gravado láser de ata 16 letras, tendo en calquera dos casos os gastos de envío de balde. Todo un acerto de Microsoft a poucas semanas da campaña de Nadal, xa que ofrecen como opción a posibilidade de mercar códigos de agasallo para que a persoa que os reciba poida confeccionar un mando ao seu gusto. Queda por ver se este servizo chegará algún día a Europa.