Microsoft e Sony asinan un acordo para manter Call of Duty en PlayStation durante 10 anos

luns, 17 de xullo do 2023 Marcus Fernández

A operación de compra de Activision Blizzard por parte de Microsoft está a piques de pecharse despois de que anulasen o bloqueo á operación que impuxera a FTC nos EE.UU., e como boa mostra de que a adquisición está a piques de facerse efectiva temos que a principal compañías que se opoñía á mesma, Sony, deu o seu brazo a torcer, e finalmente asinou un acordo para garantir que a franquía de Call of Duty estea presente en PlayStation durante os vindeiros 10 anos.
Brad Smith (Microsoft) asegura que dende o primeiro día tras a adquisición demostrarán o seu compromiso para levar Call of Duty a máis plataformas e máis consumidores que nunca, buscando así tranquilizar a reguladores, plataformas e desenvolvedores de xogos.
O que si resulta curioso do acordo pechado con Sony é que limítase a Call of Duty, cando en xaneiro de 2022 Microsoft ofrecera a Sony un acordo que incluía todos os títulos de Activision en consola, e que a compañía nipoa rexeitara, claramente como unha estratexia para oporse á compra de Activision Blizzard, o que finalmente non lles sairía moi ben, pois durante o xuízo entre Microsoft e a FTC chegaron a transcender correos electrónicos nos que quedaba claro que dende Sony estaban seguros de que Call of Duty non abandonaría as consolas PlayStation (xa que son as consolas domésticas que xeran máis ingresos, e sería suicida non contar coa plataforma).

PUBLICIDADE