Microsoft lanza unha tableta oficial do Real Madrid
xoves, 4 de xuño do 2015
O acordo de colaboración entre o Real Madrid e Microsoft
parece estar a ser bastante produtivo para ambas partes, xa que por unha banda
Microsoft consegue unha grande visibilidade, á vez que o Real Madrid pode gozar
de numerosos produtos coa súa marca (dende unha aplicación
móbil oficial do Real Madrid até unha
edición exclusiva do Lumia 535) e abundando nesta liña chega agora unha tableta
con Windows.
Temos así que xa é posible adquirir o Windows Tablet edición Real Madrid
por 199 euros, mentres que por 249 euros estará dispoñible unha edición Premium
cunha funda-atril e un teclado Bluetooth que facilita utilizar o equipo coma se
fose un ordenador portátil. Ambos modelos están dispoñibles en cor branca cunha
parte traseira da que poderemos elixir entre 3 deseños aos que se engadirá o
nome e os apelidos do usuarios así como unha frase a elixir entre tres (“¡Hala
Madrid!”, “¡Hala Madrid... y nada más!” e “¡Madridista de corazón!”). Os
primeiros en adquirir as súas tabletas recibirán de agasallo entradas dobres
para o Tour do Bernabéu por cortesía de Microsoft.
Amais, dende Microsoft tamén confirman que están a traballar nunha aplicación
oficial do Real Madrid para Windows, que permitirá unirse á comunidade de
madridistas máis grande do mundo, gozar do resumo dos partidos, ver os partidos
en diferido, repasar as mellores xogadas en multi-cámara, entrevistas
exclusivas e moito máis.
Este equipo claramente pensado como obxecto de agasallo está equipado cun
procesador Intel Acom Z3735F de catro núcleos, 2 GB de RAM, 32 GB de
almacenamento interno ampliable mediante microSD, pantalla IPS de 8,9 polgadas
cunha resolución de 1.920 x 1.200 píxeles, cámaras de 5 e 2 Mpíxeles, Wi-Fi N,
Bluetooth 4.0, batería de 6.700 mAh, un grosor de 8 milímetros e un peso de 369
gramos, que vén con Windows 8.1 e un protector ocular Reticare (valorado en
19,90 euros).
A tableta está dispoñible cunha carcasa traseira personalizable con 3 motivos distintos: