Microsoft nega as acusacións da FTC relativas á compra de Activision Blizzard

venres, 23 de decembro do 2022 Marcus Fernández

Microsoft pechou un acordo de adquisición de Activision Blizzard por valor de 69 mil millóns de dólares, quedando pendente a operación da aprobación dos distintos organismos reguladores, resultando bastante sorprendente que o organismo que regula a competencia nos EE.UU., a FTC, decidise opoñerse á operación facendo seus case literalmente os argumentos presentados por Sony, compañía que considera que o fortalecemento de Xbox pode prexudicar a PlayStation.
Os argumentos esgrimidos pola FTC están a ser rexeitados por practicamente todos os axentes do sector (incluíndo o principal sindicato da industria nos EE.UU.), polo que non sorprende a ninguén que a resposta oficial de Microsoft neguen punto por punto todas as acusacións presentadas pola FTC, e incluso manifestan que «dar aos consumidores contido de alta calidade de máis xeitos e a prezos menores é o que as leis de defensa da competencia teñen que promover, non previr», pondo en dúbida as motivacións da FTC.
Microsoft insiste en que a empresa resultante da incorporación de Activision Blizzard en Xbox é positivo para os xogadores, e aínda que se estea a insistir moito na franquía de Call of Duty, eles consideran que o feito de que na compra estea incluído a compañía de xogos para móbiles King é moito máis relevante, xa que permite a Microsoft avanzar no mercado dos xogos para móbiles, abrindo moitas posibilidades.
Sobre Call of Duty deixan claro que non teñen a intención de facer que a franquía pase a ser exclusiva de Xbox, e incluso están a ofrecer acordos a 10 anos vista con PlayStation, Nintendo e Valve. De feito as acusacións de Sony resultan bastante cínicas, xa que a compañía nipoa di que Microsoft podería prexudicalos no futuro a través de Call of Duty, facendo que o xogo ou algún dos seus contidos, non chegase ou chegase máis tarde a PlayStation que a Xbox, pese a que Microsoft está a comprometerse a non facer tal e aproveitan a ocasión para deixar claro que é Sony a compañía que opera así, desvelando que os xogos Final Fantasy VII Remake, Final Fantasy XVI, Silent Hill 2 e Bloodborne nunca poderán chegar a publicarse en Xbox por mor de imposicións contractuais de Sony.
A resposta de Microsoft á FTC tamén nega que a compañía de Redmond mentise ante a Comisión Europea sobre como ía actuar tras a compra de Bethesda (facendo que os xogos Starfield e Redfall non vaian saír para consolas PlayStation) e, de feito, a propia Comisión non considerou que Microsoft enganase nas audiencias sobre esta outra importante adquisición.
Microsoft lembra que incluso tras a compra de Activision Blizzard a compañía seguiría estando nunha terceira posición do sector dos videoxogos, quedando aínda bastante por detrás de PlayStation e Nintendo; e sobre as reticencias sobre o Game Pass, defenden que queren reforzar o servizo para facelo atractivo, asegurando que Sony tamén ten PlayStation Plus, e incluso hai servizos de xogos na nube como Amazon Luna, nVIDIA GeForce NOW e Google Stadia, ou sexa, que estamos ante servizos emerxentes que non destacan precisamente pola falta de competencia.
Confíase en que o procedemento xudicial contra a operación sexa rápido, pois está previsto que a adquisición de Activision Blizzard poida completarse en xuño de 2023.

PUBLICIDADE