Microsoft prepara a volta de Call of Duty ás consolas de Nintendo

A primeiros de ano Microsoft sorprendeu anunciando o peche dun acordo de compra por Activision Blizzard, compañía editora de títulos como Call of Duty ou Warcraft, quedando a operación en espera de recibir a aprobación das autoridades de competencia, o que está a resultar máis difícil do esperado por mor de presións exercidas por Sony ante os reguladores, o que levou a Microsoft a insistir en que seguirán publicando versións de Call of Duty para consolas PlayStation durante un mínimo de 10 anos (compromiso sen precedentes na industria) e agora levan este compromiso máis adiante, e anuncian que tamén achegarán durante 10 anos entregas de Call of Duty a consolas de Nintendo, das que están ausentes dende o lanzamento da Switch.
Phil Spencer, máximo responsable de Xbox, tamén incide no feito de que Microsoft tamén se compromete a ofrecer os xogos de Call of Duty para PC de xeito simultáneo na tenda dixital de Valve, Steam, e en Xbox.
Con estes compromisos Microsoft estaría buscando despexar toda dúbida que puidesen ter os reguladores de que a compra de Activision Blizzard non danará a competencia, xa que a idea de Microsoft non é de deixar de vender xogos para as consolas da competencia, senón que a versión para a súa consola estea incluída no Game Pass, de xeito que o servizo de subscrición gañe cada vez máis valor, instando a máis xogadores a subscribirse e apostar por Xbox, simplemente porque sexa máis atractivo pagar unha mensualidade que ter que pagar o prezo completo dos xogos de querer gozar dos mesmos dende o seu lanzamento.