Microsoft presenta dous modelos de IA desenvolvidos internamente

Microsoft vén de anunciar un avance decisivo na súa estratexia de desenvolvemento de intelixencia artificial, coa presentación de dous modelos de linguaxe desenvolvidos internamente. A través da división Microsoft AI (MAI), a compañía reafirma o seu compromiso cunha tecnoloxía centrada nas persoas, accesible, responsable e orientada a mellorar a vida cotiá, e demostra que a súa aposta pola IA non se limita a OpenAI.
O primeiro modelo, MAI-Voice-1, destaca pola súa capacidade expresiva e natural na xeración de voz. Xa está integrado en servizos como Copilot Daily e Podcasts, e tamén se pode probar como experiencia experimental en Copilot Labs. Esta ferramenta permite crear audio de alta fidelidade en tempo real, mesmo en escenarios con múltiples interlocutores. A súa eficiencia técnica é notable: pode producir un minuto de audio en menos dun segundo utilizando unha única unidade gráfica de procesamento (GPU), o que o sitúa entre os sistemas de voz máis avanzados e rendibles do mercado.
En paralelo, Microsoft iniciou as probas públicas de MAI-1-preview, o seu primeiro modelo fundacional adestrado de xeito integral. Este modelo, baseado nunha arquitectura de expertos combinados, foi desenvolvido con arredor de 15.000 GPU nVIDIA H100 e está orientado a ofrecer respostas útiles e precisas a peticións textuais diversas. A súa implementación progresiva en Copilot permitirá recoller impresións dos usuarios e perfeccionar o seu rendemento.
Ambos modelos forman parte dunha visión máis ampla que busca artellar un ecosistema de intelixencia artificial adaptable ás necesidades específicas de cada persoa e organización. Microsoft aposta por unha combinación de modelos especializados que dean resposta a intencións diversas, abrindo así novas posibilidades para a interacción humano-máquina.