Microsoft volve ampliar as actualizacións de seguridade estendidas de Windows 10

Microsoft ampliou de forma discreta a duración do programa de Actualizacións de Seguridade Estendidas (Extended Security Updates, ESU) para Windows 10 destinado a usuarios particulares. A documentación oficial confirma agora que o servizo permanecerá activo ata o 12 de outubro de 2027, un ano máis do previsto inicialmente, e que os usuarios xa inscritos non terán que realizar ningunha acción para seguir recibindo os parches de seguridade.
O programa ESU naceu como unha solución para permitir que os equipos con Windows 10 continuasen recibindo actualizacións críticas de seguridade despois do remate do soporte oficial do sistema operativo, producido o 14 de outubro de 2025. Ata agora, Microsoft prevía ofrecer esta cobertura adicional só durante un ano, ata outubro de 2026.
A nova páxina de soporte da compañía modifica esa planificación e indica expresamente que «Windows 10 xa non recibe soporte. Pode inscribirse no programa ESU en calquera momento ata que remate o 12 de outubro de 2027. Se xa está inscrito, a cobertura prolongarase automaticamente ata esa data, sen necesidade de realizar ningunha acción».
O programa continúa limitado ás actualizacións de seguridade consideradas críticas ou importantes polo Microsoft Security Response Center (MSRC). Non inclúe novas funcións, melloras do sistema nin soporte técnico.
Os usuarios particulares poden acceder ao programa de tres formas distintas: de balde se sincronizan a configuración do PC coa súa conta de Microsoft, empregando 1.000 puntos de Microsoft Rewards ou mediante un pagamento único de 30 dólares (ou o seu equivalente na moeda local, máis os impostos correspondentes). Unha mesma licenza pode utilizarse en ata dez dispositivos asociados á mesma conta de Microsoft.
Para poder inscribirse é necesario executar Windows 10 versión 22H2 nas edicións Home, Professional, Pro Education ou Workstations, ter instaladas as últimas actualizacións do sistema e empregar unha conta de Microsoft con permisos de administrador. Os equipos unidos a dominios de Active Directory, Microsoft Entra ou xestionados mediante solucións MDM quedan fóra deste programa para consumidores, xa que dispoñen das súas propias modalidades de ESU.
Microsoft non explicou oficialmente os motivos desta ampliación. A decisión chega, porén, nun momento no que centos de millóns de equipos seguen funcionando con Windows 10 e moitos deles non cumpren os requisitos de hardware para actualizarse a Windows 11. Esta extensión permitirá que estes dispositivos continúen recibindo parches de seguridade durante dous anos adicionais tras o final do soporte oficial, reducindo a exposición a vulnerabilidades mentres os seus propietarios planifican a migración a un sistema máis recente.