Microsoft xa integra GPT-5 nos seus produtos e servizos

Pouco despois da presentación de GPT-5 xa está dispoñible a través de Copilot

Tras a presentación en sociedade de GPT-5 por parte de OpenAI, Microsoft anunciou a súa incorporación a unha ampla gama dos seus produtos e servizos, tanto para usuarios particulares como para empresas e desenvolvedores. O modelo, adestrado en Azure, combina as últimas capacidades de razoamento de OpenAI cun sistema rápido e versátil, co obxectivo de ofrecer sempre a ferramenta máis axeitada segundo a tarefa, xa sexa nun contexto de consumo, profesional ou de desenvolvemento.
A través de Microsoft 365 Copilot e Microsoft Copilot, os usuarios poderán beneficiarse automaticamente das melloras en razoamento e creatividade que achega GPT-5, sen ter que decidir que modelo empregar, grazas a un enrutador en tempo real. No ámbito empresarial, Microsoft 365 Copilot poderá analizar e contextualizar correos electrónicos, documentos e ficheiros, facilitando a xestión de tarefas complexas. Ademais, Microsoft Copilot Studio permitirá crear axentes personalizados baseados en GPT-5 para procesos de negocio avanzados.
No caso de Microsoft Copilot, dispoñible de balde en web e aplicacións para Windows, Mac, Android e iOS, introdúcese o novo modo Smart, que emprega GPT-5 para ofrecer solucións máis precisas e completas a consultas complexas, mellorar textos ou xerar imaxes a partir de ideas.
Os desenvolvedores tamén terán acceso ao novo modelo. GitHub integrará GPT-5 en todos os plans de pagamento de GitHub Copilot, permitindo escribir, probar e implementar código tanto en GitHub Copilot Chat como en Visual Studio Code e GitHub Mobile, co apoio da extensión Azure AI Foundry para crear axentes sen saír do editor. Pola súa parte, Azure AI Foundry incorporará todos os modelos GPT-5 cun sistema de enrutado que selecciona o máis axeitado segundo a complexidade, o rendemento e o custo de cada solicitude.
O AI Red Team de Microsoft someteu o modelo de razoamento de GPT-5 a probas rigorosas antes do seu lanzamento, constatando que ofrece un dos perfís de seguridade máis sólidos en comparación con versións anteriores, especialmente fronte á xeración de malware, a automatización de fraudes ou outros usos maliciosos. As actualizacións comezan a despregarse hoxe para todos os segmentos de usuarios da compañía.