Motorola lanza 2 novos smartphones no Brasil

venres, 15 de marzo do 2013 Marcus Fernández

Aínda que Motorola está a abandonar a meirande parte das súas liñas de dispositivos móbiles, e non parecía que fósemos ver nada novo da compañía ata que anuncie os seus móbiles insignia, esta semana soubemos dos novos terminais de gama media que está a vender no Brasil, que chegan con Android 4.1 e o compromiso de actualizarse á seguinte versión de Android. Ambos veñen con cámara con funcións avanzadas como HDR (que optimiza as imaxes que mesturan partes claras e escuras) e BSI (que facilita a toma de imaxes con pouca luz).
O Motorola RAZR D1 chegou o pasado mércores a un prezo de 549 reais (212,86 euros) na súa versión con dobre SIM. Este móbil funciona cun procesador a 1 GHz, 1 Gb de RAM, 4 Gb de almacenamento interno ampliable mediante tarxetas microSD de ata 32 Gb, sintonizador de radio FM, pantalla de 3,5 polgadas e batería de 1.785 mAh.
O Motorola RAZR D3 é un smartphone máis potente, que tardará varias semanas en pórse á venda por 799 reais (309,79 euros), e funciona cun procesador de dobre núcleo a 1,2 GHz, 1 Gb de RAM, 4 Gb de almacenamento interno (ampliable mediante tarxetas microSD de ata 32 Gb), sintonizador de radio FM, pantalla de 4 polgadas resistente a rabuñaduras e batería de 2.000 mAh.

PUBLICIDADE