Motorola presenta o seu novo smartphone de alta gama

Motorola vén de presentar o seu novo móbil insignia para Europa, o Edge 40 Pro, un potente teléfono que funciona cun procesador Qualcomm Snapdragon 8 Gen 2, equipado con 12 GB de RAM LPDDR5X e 256 GB de almacenamento UFS 4.0, que presenta unha pantalla pOLED Full HD+ de 6,67 polgadas cunha velocidade de actualización de 165 Hz e un brillo de 1.300 nits así como altofalantes estéreo con Dolby Atmos, de xeito que resulta moi agradecido para a reprodución multimedia e o xogo.
Este novo smartphone tamén conta con Bluetooth 5.3, NFC, Wi-Fi 6E (estando preparado para Wi-Fi 7); a súa batería de 4.600 mAh pode cargarse por cable até a 125 watts e sen fíos a 15 watts (contando tamén con carga inversa sen fíos de 5 watts); e incluso ten resistencia IP68, deixando claro que estamos ante un auténtico móbil de alta gama.
A nivel de cámaras tamén destaca pola súa cámara traseira tripla cun sensor principal de 50 Mpíxeles con estabilización óptica, un grande angular de 50 Mpíxeles e un teleobxectivo 2x de 12 Mpíxeles, mentres que a cámara frontal sorprende cun sensor principal de 60 Mpíxeles.
Estamos ante un dispositivo moi completo, co que buscan xustificar o seu prezo de 899 euros, aínda que o principal pero que se lle podería pór é que, aínda que vén con Android 13, non se anuncia cantas actualizacións de sistema ofrecerá, algo no que Motorola está a quedar atrás ultimamente ao ofrecer só 2 anos de actualizacións de sistema e 3 de parches de seguridade, mentres que empresas como Samsung, Oppo ou OnePlus ofrecen actualmente 4 anos de actualizacións de sistema e 5 anos de parches de seguridade para os seus móbiles de alta gama.