Netflix inicia as probas da súa plataforma de xogo na nube

A aplicación de mando de xogos que Netflix estreou na App Store confirmou o que se vía vir, pois a compañía de vídeo en streaming anunciou hoxe que dentro da súa aposta polos videoxogos, que até o momento limitábase a dispositivos móbiles, vai chegar tamén a televisores e ordenadores.
Concretamente aseguran que están a desenvolver unha proba entre un número reducido de usuarios de Canadá e Reino Unido, inicialmente no televisor e, nas vindeiras semanas tamén para ordenadores a través do navegador. Esta probas realizaranse cos xogos Oxenfree de Night School Studio e Molehew’s Mining Adventure de Netflix Game Studio. Estes xogos para o televisor manexaríanse a través na aplicación móbil antes mencionada, mentres que en ordenadores manexaríanse co teclado e o rato.
Esta tecnoloxía de xogo na nube desenvolverá estas probas en grande medida para poder optimizar a experiencia aos numerosos dispositivos nos que está presente Netflix, como sería os Fire TV, os Chromecast con Google TV, os televisores de Samsung e LG, ou os dispositivos nVIDIA Shield TV, aos que se irán incorporando máis dispositivos no futuro, entre os que polo momento non se espera que estea o Apple TV, por mor das normas contra o streaming de videoxogos que impón a compañía de Cupertino.