Netflix recupera o Buscaminas

Os xogos de ordenador máis populares podemos dicir sen temor a errar que serían o Solitario e o Buscaminas, por estar incluídos no Windows coa idea de familiarizar aos usuarios con conceptos da interface do sistema como son as accións de arrastrar e soltar ou de premer o botón dereito do rato.
Aínda que Microsoft segue a ofrecer de balde estes xogos (que xa non veñen preinstalados en todos os equipos), agora é Netflix o que recupera un destes títulos, nunha curiosa versión para móbiles. Deste xeito os subscritores da compañía de streaming poden gozar de balde en Android e en iOS do Buscaminas, nunha versión desenvolvida por Smoking Gun Interactive para Netflix, que está optimizada para o seu uso en pantalla táctil, de xeito que o usuario pode facer pinza dos dedos para aproximarse ou afastar a imaxe, e premer as celas nas que crea que hai ou non unha mina agochada alternando entre os modos bandeira e revelar.
Para facer máis variado e divertido este xogo, as distintas pantallas repartiranse a través de diferentes lugares do mundo, dotando as partidas de variedade gráfica; á vez que tamén haberá que superar 3 novos desafíos cada día con distintos niveis de dificultade.