No Portal da Lingua todo o relativo a FalaRedes 2023, que colle pulo con Os Bolechas Deportistas
xoves, 22 de xuño do 2023
O
secretario xeral de Política Lingüística, Valentín García,
participou na mañá deste xoves 22 de xuño na rolda de prensa de
presentación do espectáculo Os Bolechas deportistas
viaxan no tempo, que vai desenvolver a editorial Bolanda no marco
da programación de verán do FalaRedes 2023, o programa de
dinamización lingüística do dito departamento.
A
xira arranca este venres en Ribeira e proseguirá por 15 concellos da
Rede de Dinamización Lingüística co “obxectivo de fomentar o uso
da lingua galega no deporte e os hábitos de vida saudábeis entre a
rapazada”. Valentín García, que estivo arroupado na presentación
pola familia Bolechas ao completo, salientou a relevancia de
dinamizar o galego nun “ámbito coma o do deporte, asociado a
valores positivos e que ocupa moitas horas de actividade dos nosos
rapaces e rapazas”.
Trátase
da segunda edición da serie Os Bolechas deportistas, coa que
os personaxes creados polo ilustrador Pepe Carreiro dan a coñecer
diferentes disciplinas de hábitos saudábeis de lecer e promoven o
uso da lingua galega durante a súa práctica. A través dun teatro
de monicreques e outras actividades complementarias ao pé da rúa,
os Bolechas viaxarán por toda a xeografía galega coas súas
aventuras, que os levarán a construír unha máquina coa que
practicar os deportes do pasado, presente e futuro.
A
xira comezará este venres 23 ás 12.00 horas na avenida do Malecón,
en Ribeira, e pasará durante os próximos meses por: Chantada (praza
de España) o 24 de xuño, Barreiros (praza do Concello) o 7 de
xullo, Campo Lameiro (praza do Concello) o 8 de xullo, Vilanova de
Arousa (praza dos Olmos) o 9 de xullo, Castro Caldelas (praza do
Prado) o 15 de xullo, Boqueixón (Carballeira de Rodiño) o 16 de
xullo, O Pereiro do Aguiar (CEIP Plurilingüe Ben-Cho-Shey) o 21 de
xullo, Quiroga (praza da rúa Lago) o 21 de xullo, Frades (Campo da
festa de Galegos) o 25 de xullo, Mondariz (praza de España) o 29 de
xullo, Ares (Parque Rosalía de Castro) o 30 de xullo, Baiona (praza
do Concello) o 1 de agosto, Bande (praza da Constitución) o 4 de
agosto e A Pobra de Trives (praza do Reloxo) o 5 de agosto.
As
datas e as horas exactas poden consultarse como de costume no Portal
da Lingua Galega, a web que aglutina e centraliza a actividade
autonómica de promoción lingüística.
55
pases para os próximos meses
Esta
actividade enmárcase na programación de verán do FalaRedes 2023,
que ten previstos para os próximos meses 55 pases de actividades
tales como espectáculos, monicreques e mesmo unha exposición para
distribuír entre distintos concellos e agrupacións membros da Rede
de Dinamización Lingüística.
Os
obxectivos deste programa, que xa vai pola súa duodécima edición,
“son ampliar a oferta de ocio no noso idioma, reforzar a oferta de
actividades en galego dos concellos adscritos, promover o uso e
valoración positiva da lingua propia de Galicia e apoiar os e as
artistas que desenvolven o seu traballo nela”, segundo explicou o
secretario xeral Valentín García.
