Noa Innova formará en dixitalización a persoas desempregadas de máis de 45 anos
xoves, 22 de outubro do 2020
A
Consellería de Emprego e Igualdade adxudicou á empresa lucense Noa
Innova un plan piloto de formación para capacitar dixitalmente a
persoas desempregadas de máis de 45 anos. Trátase do Proxecto
Piloto Sénior Dixital, que Noa Innova vai iniciar este mes de
outubro abordando a relevancia de transformar non só as empresas de
cara a nova realidade, senón tamén o noso propio adestramento e
coñecemento profesional.
A
empresa porá en xogo unha contorna totalmente dixital de formación
en liña, con contidos sobre as posibilidades que nos abre a
informática na nube e os principais recursos e servizos para tirar
proveito dela (por exemplo Google Drive, que centrará parte da
actividade, poñendo o foco nas súas potencialidades para operar en
remoto, traballar en equipo, almacenar e manexar grandes cantidades
de datos e executar proxectos colaborativos online).
Como
dixemos, o Piloto Sénior Dixital busca mellorar a empregabilidade
daquelas persoas desempregadas de longa duración e maiores de 45
anos de toda Galicia, “xa que o mercado laboral mostra un aumento
da demanda de perfís profesionais que, ademais de presentar unha
cualificación e formación determinada, posúan tamén competencias
transversais, especialmente en dixitalización e/ou habilidades
persoais”, explica a empresa lucense, engadindo que a incidencia da
COVID non fixo máis que intensificar estas necesidades e estas
demandas, “xa que as empresas necesitan incorporar ao seu persoal
persoas resilientes e con capacidade de adaptación ao traballo
colaborativo para afrontar de xeito eficiente as novas contornas
laborais”.
O
curso desenvolverase en modalidade online, a través
dunha plataforma de teleformación que Noa Innova cualifica de
“sinxela e intuitiva”, á que se pode acceder desde calquera
dispositivo (smartphone, computador, tableta). Cada módulo
contará cun titor especializado con ampla experiencia profesional en
empresas privadas e como docentes de teleformación. Incluirá
sesións en streaming nas que os titores traballarán os
contidos para apoiar os coñecementos teóricos adquiridos polos
alumnos. Ao longo de toda a duración do curso, os participantes
terán á súa disposición unha orientadora que, por unha banda,
impartirá un módulo sobre traballo en equipo, e por outro dará
apoio laboral aos participantes durante todo o itinerario formativo
para obter a súa inserción laboral.