Nokia fai unha videochamada móbil con audio inmersivo

luns, 10 de xuño do 2024 Redacción

Nokia anunciou a realización da primeira chamada con audio inmersivo sobre unha rede móbil. Pekka Lundmark, presidente e director xeral de Nokia, realizou unha videochamada con audio inmersivo en directo con Stefan Lindström, embaixador de Dixitalización e Novas Tecnoloxías de Finlandia.
A chamada foi posible grazas á nova tecnoloxía do codec de Servizos de Voz e Audio Inmersivos (IVAS), que forma parte do próximo estándar 5G Advanced. O codec IVAS permite aos consumidores escoitar o son espacialmente en tempo real, en vez da experiencia de chamada de voz monofónica dos smartphones de hoxe en día. Lundmark demostrou as dimensións acústicas distintivas que se poden experimentar coa nova tecnoloxía IVAS a Lindström mentres o chamaba desde o campus de Nokia en Espoo.
Pekka Lundmark considera que esta tecnoloxía é «o futuro das chamadas de voz. Esta innovadora tecnoloxía de audio lévate ao entorno do interlocutor, creando unha experiencia de escoita espacial e mellorada masivamente para chamadas de voz e vídeo, ofrecendo beneficios significativos para aplicacións empresariais e industriais».
A tecnoloxía do codec de Servizos de Voz e Audio Inmersivos (IVAS) permite audio espacial en directo en calquera dispositivo conectado (por exemplo, smartphones, tabletas ou ordenadores), reunindo ás persoas para unha interacción real con son tridimensional.
O estándar do codec 3GPP IVAS foi desenvolvido por un consorcio de 13 empresas baixo o marco da colaboración pública do codec IVAS. Nokia foi líder nestes esforzos de estandarización e contribuíu con partes importantes da tecnoloxía ao estándar, incluíndo o desenvolvemento dun formato específico para smartphones para o estándar IVAS. Incluír esta innovación nun estándar mundial é clave para permitir a interoperabilidade entre operadores, fabricantes de chipset e dispositivos, facendo a comunicación espacial dispoñible para todos.
Nokia foi capaz de demostrar con éxito a tecnoloxía IVAS nunha chamada en tempo real aínda que a tecnoloxía aínda non foi implementada nas redes móbiles. Esta primeira chamada en directo usou a tecnoloxía de Voz Inmersiva propietaria de Nokia para lograr a experiencia sobre unha rede pública 5G.

PUBLICIDADE