Nokia presenta novos móbiles básicos con conectividade 3G e acceso ás redes sociais

Para quen non desexe un smartphone ou para empregar como segundo teléfono, Nokia presentou hoxe os novos Nokia 207 e Nokia 208, uns móbiles en formato barra, cunha xenerosa pantalla de 2,4 polgadas, Bluetooth 3.0, conectividade HSPA (o que permítelle tirar proveito da banda larga móbil tanto dende o navegador Nokia Xpress ou de aplicacións como Facebook, Twitter e WhatsApp) e unha batería de 1.020 mAh (que permitiría unha autonomía en espera de máis dun mes e ata 12 horas de conversa a través de 2G).
O Nokia 207 sería o modelo máis básico, cunha única tarxeta micro-SIM e sen cámara; mentres que o Nokia 208 contaría cunha cámara de 1,3 Mpíxeles e tamén estará dispoñible nalgúns mercados con dobre SIM (con Easy Swap, que permite mudar de tarxeta sen ter que apagar o dispositivo). O prezo destes móbiles no mercado libre estará no contorno dos 68 dólares (52,42 euros) antes de impostos.

Vídeo promocional do Nokia 208 con dobre SIM