Nova cámara de medio formato de Hasselblad

Hasselblad anunciou o lanzamento da X2D II 100C, a súa nova cámara insignia de formato medio, que chega como a primeira do sector en ofrecer alto rango dinámico (HDR) real de principio a fin nun sensor de 100 Mpíxeles. O modelo incorpora un sistema de enfoque automático continuo AF-C con algoritmos de aprendizaxe profunda, 10 pasos de estabilización de imaxe no corpo, e a integración coa aplicación Phocus Mobile 2 para un fluxo de traballo portátil e avanzado.
A X2D II 100C conta cun sensor BSI CMOS de 100 Mpíxeles con 16 bits de profundidade de cor (ata 281 billóns de cores), ofrece un rango dinámico de 15,3 pasos e un ISO nativo de 50, garantindo precisión tanto en sombras como en altas luces. O seu sistema de estabilización de 5 eixes logra unha compensación de ata 10 pasos, permitindo exposicións manuais de varios segundos sen necesidade de trípode.
Entre as novidades destaca a introdución do AF-C en cámaras Hasselblad, que combina detección de fase en 425 zonas con asistencia LiDAR e un iluminador AF para mellorar o enfoque en condicións de pouca luz. Ademais, a pantalla OLED de 3,6 polgadas, con 1.400 nits de brillo máximo, é un 75 % máis luminosa ca na xeración anterior e facilita a revisión inmediata das imaxes HDR procesadas como HEIF ou JPEG Ultra HDR.
O deseño tamén foi refinado: a nova estrutura é un 7,5 % máis lixeira, incorpora un acabado en gris grafito mate de alta durabilidade, empuñadura ergonómica mellorada e un visor electrónico complementado cunha pantalla abatible que se pode extraer sen interferir. O control inclúe un joystick de 5 direccións e oito botóns personalizables. A cámara mantén o almacenamento interno SSD de 1 TB e engade unha rañura para tarxetas CFexpress Tipo B.
A Hasselblad X2D II 100C xa está dispoñible a un prezo de 7.200 euros só o corpo ou cun obxectivo (a elixir entre 3 modelos) por entre 11.399 e 11.999 euros.