Nova sentenza xudicial relativa ao polémico WebTV de Blusens

En 2018 soubemos da retirada do mercado do WebTV da galega Blusens, para que uns anos despois a Fiscalía pedise un ano de cadea para o fundador da compañía por un delito contra a propiedade industrial e por organización criminal ao facilitar o acceso a contidos audiovisuais de xeito ilegal a través da comercialización dos mencionados receptores da marca.
Semellaba que a causa, iniciada en 2017 tras unha denuncia de EGEDA (á que se sumaron Telefónica España, Group Mediapro, LaLiga, Multicanal Iberia e Adivan), tiña rematado o seu percorrido, pero agora a Entidade de Xestión de Dereitos dos Produtores Audiovisuais informa de que Xulgado do Penal número 2 de Santiago de Compostela ditou o pasado 9 de abril unha sentenza pola que se condena a seis meses de prisión, unha multa de seis meses cunha cota diaria de seis euros, o comiso dos obxectos intervidos e a inhabilitación especial durante un ano para o exercicio de actividades comerciais relacionadas cos dispositivos WebTv que vulneraban os dereitos de propiedade intelectual distribuídos pola compañía Blusens.
A sentenza tamén impón unha indemnización dun millón douscentos mil euros e o pago das costas do proceso a catro empresarios vinculados con esta compañía, por un delito agravado contra a propiedade intelectual. A resolución xudicial tamén inclúe unha quinta persoa que empregaba a rede social Telegram para fomentar un foro no que se publicitaba e promovía o uso destes dispositivos manipulados. Trátase dunha das maiores indemnizacións concedidas en España por unha operación deste tipo.