Nove proxectos galegos formarán parte da 5ª edición da Business Factory Aero

O CIFP As Mercedes de Lugo servía este 3 de novembro de punto de acollida para os doce novos proxectos empresariais que formarán parte da 5ª edición da Business Factory Aero (BFAero), o programa de incubación, aceleración e consolidación de empresas especializado no segmento dos vehículos non tripulados do Polo Aeroespacial de Galicia. Ao acto asistía a directora da Axencia Galega de Innovación (GAIN), Patricia Argerey, acompañada do delegado territorial da Xunta de Galicia en Lugo, Javier Arias.
Dicir que os proxectos elixidos resultaron da escolla de 144 propostas de 26 países e que consolidou o programa como un reclamo para emprendedores de todo o mundo. A BFAero tense convertido nunha panca fundamental para o impulso da industria aeroespacial galega, contribuíndo a xerar e atraer talento e innovación na nosa Comunidade.
Así, das 12 novas propostas empresariais que hoxe se integran na BFAero, un total de nove corresponden a startups e spin-offs de orixe galega; e as outras tres son de Madrid (dúas) e Valencia. Un total de tres proxectos acceden ao itinerario de incubación, seis ao de aceleración; e outros tres ao de consolidación.
Os 12 proxectos seleccionados empregan a 66 persoas e contemplan a fabricación dunha aeronave ultralixeira e cun alto estándar de calidade, un innovador programa de formación dirixido a persoas que queiran incorporarse profesionalmente á industria dos drons ou unha solución que integra tecnoloxía de vehículos non tripulados e Intelixencia Artificial para mellorar a información de análise sobre os adestramentos e os partidos aos equipos de fútbol mediante a integración de solucións avanzadas de imaxes e de datos capturados con vehículos non tripulados.
No evento celebrado hoxe tamén se entregaron os diplomas acreditativos ás startups que participaron nos itinerarios de incubación (Aguia, Kreios e Ahyres) e de aceleración (Enercraft, Generadron, Beagle Technology, Dronfies Labs e Anduriña25) da cuarta edición do programa.
Asemade salientáronse fitos relevantes da cuarta edición como o acordo de transferencia de tecnoloxía coa Universidade de Stuttgart de Kreios Space; o primeiro contrato coa Axencia Galega de Infraestruturas de Aguia; a sinatura dun contrato coa empresa Net2Fly por parte de Cielum; o acordo de FuVex con Naturgy para a inspección e mantemento de máis de 100.000 quilómetros de tendido eléctrico con drons; ou a obtención de apoio do programa NEOTEC de axuda pública a proxectos innovadores do CDTI por parte de Kreios Space e Ahyres.
Indo aos elixidos, Arzeos Aircraft (Silleda), está promovida pola startup co mesmo nome, a proposta está centrada no deseño e fabricación dunha aeronave ultralixeira que incorporará novos mecanismos de seguridade pasiva e innovacións en materia de aerodinámica e ergonomía, que suporán unha mellora na operación de voo e na seguridade dos ocupantes; así como o desenvolvemento dun proceso de fabricación que permitirá a redución de custos. Trátase dunha avioneta que se deseñará e construirá integramente en Silleda e que ten prevista a súa presentación en Alemaña nos vindeiros meses.
Outro proxecto é Banco de probas virtual para o estudo da aerodinámica de UAVs con aplicación no transporte de cargas e condicións de voo (Santiago de Compostela). Promovido por Ventilatio Lab, spin off da Universidade de Santiago de Compostela, este proxecto propón a definición dun entorno de simulación co obxectivo de analizar a aerodinámica e condicións de voo de UAVs para valorar se poden ou non transportar cargas e como optimizar a súa colocación.
O proxecto Drone Net (Alpedrete, Madrid) está promovido por Soluciones de Ingeniería de Iberia e está enfocado en achegar a fabricantes e provedores de servizos UAS unha solución para pilotar, xestionar e monitorizar toda a frota mediante comunicacións móbiles e satelitais. Isto permite operar de maneira segura en condicións de BVLOS (máis aló da liña de vista), amais de ofrecer grandes vantaxes en custos ou operar toda unha flota dende unha soa central de control por un único piloto.
O proxecto ACRE (Nigrán, Pontevedra), ACRE (Área de Control Restrinxida de Emerxencias) da empresa VIG-SEC-DRONE, é un software de xestión do espazo aéreo de emerxencias que permite o uso simultáneo de aeronaves tripuladas e non tripuladas. Valorado pola súa singularidade para o ecosistema aeronáutico galego, este proxecto só recibe titorización e mentorización.
Plataforma para o desenvolvemento de sistemas de propulsión autónomos en órbitas VLEO (Lugo), este proxecto da startup Kreios Space está centrado no desenvolvemento dun novo sistema de propulsión eléctrica para satélites que operan en órbitas baixas. A tecnoloxía de Kreios Space permite que os satélites se manteñan indefinidamente en órbitas comerciais de interese, incluíndo altitudes de 100-450 km (VLEO), sen necesidade de combustíbel, grazas á súa capacidade para superar a forza aerodinámica da atmosfera. A redución dos custos das misións espaciais ou a optimización das cargas útiles son algúns dos beneficios da adopción desta tecnoloxía.
Lanzamento ao mercado das solucións tecnolóxicas de ITG Drone para operadores UAVs: ITG DroneSafeBox e DroneSuite (A Coruña). O proxecto desta spin-off do Instituto Tecnolóxico de Galicia, ITG Drone Solutions, está centrado en mellorar a competitividade das empresas do sector dos vehículos non tripulados a través de dúas solucións: DroneSafeBox, unha solución única drone-in-a-box para despregar, recuperar e recargar os drons, optimizando as operacións e reducindo custos e tempos de resposta; e DroneSuite, unha plataforma cloud para a xestión das operacións de frotas de drons, que ofrece unha forte integración con ferramentas de voo e procesamento de datos, automatizando procesos e sincronizando e almacenando información de forma segura.
Smart Pavement Analytics (Oleiros, A Coruña). O proxecto, promovido por Aguia Analítica Avanzada propón unha solución de análise de datos que emprega algoritmos de Intelixencia Artificial sobre imaxes tomadas desde drons para coñecer o estado das infraestruturas e mellorar a súa xestión.
TheDroneMBA (As Pontes, A Coruña). Impulsado por The Drone Programs, propón a creación dun programa de formación disruptivo dirixido a aquelas persoas que queiran incorporarse profesionalmente á industria dos drons, achegando os coñecementos sobre o manexo de vehículos non tripulados demandados nas diferentes industrias.
Embarcación eléctrica non tripulada de rescate (Valencia). Este proxecto da empresa valenciana Proteus Innovation está centrado na creación de Náutic, un dron mariño dun metro de lonxitude, que pode ser dirixido por radiocontrol ou pilotado por un socorrista, ideado para realizar rescates na auga e que permite transportar ata 3 persoas.
Beagle Technology (Narón, A Coruña). Este proxecto é unha solución de hardware e software que permite ofrecer información situacional mellorada en operacións de emerxencias.
Fly-Fut (Madrid). Esta startup presenta unha solución que integra tecnoloxía de drons e Intelixencia Artificial para achegar a mellor información a analistas e adestradores de equipos de fútbol, ofrecendo solucións avanzadas de imaxes e de datos, que substitúen ás tomadas con cámaras fixas.
Anduriña25 (Serra de Outes, A Coruña). Impulsado por Soluciones Aeronáuticas de Galicia, este proxecto está centrado no deseño e fabricación dun dron híbrido cun concepto estrutural e aerodinámico innovador que lle permite voar en condicións fiábeis, eficientes e seguras sen poñer en risco a integridade da aeronave ou da carga que transporta.