Novo ¿ultraportátil? de Dell

Un novo ultraportátil chega ao catálogo de Dell, o Inspiron Mini 12, que podería ser o equipo que debuxase a fronteira entre os portátiles e os ultraportátiles, posto que este ordenador con procesador Intel Atom e un peso de 1,2 Kg. incorpora unha pantalla de 12,1 polgadas cunha resolución de 1.280 x 800 píxeles, o que para moitos xa entraría na serie de portátiles pequenos, polo que podemos considerar que este novo produto marcaría a liña de separación.
O Inspiron Mini 12 vén cun disco duro de 80 Gb, 1 Gb de RAM, webcam, Bluetooth e Wi-Fi, e polo momento só se vende no Xapón, agardándose a súa chegada aos EE.UU. o vindeiro mes a preto de 600 dólares (polo que tamén queda claro que non se lle pode aplicar o apelido do baixo custo), incluíndo por defecto unha batería de 3 celas, coa opción de encargalo cunha de 6 celas que podería achegar unha autonomía de preto de 6 horas.
Aínda non se coñece a data de lanzamento do novo equipo en Europa, pero se algo resulta rechamante do novo portátil é que se podería adquirir con Windows Vista Home Basic (aínda que non parece que estea á altura do sistema operativo de Microsoft) contando tamén coa opción de adquirirse con XP ou Ubuntu Linux.