O 5º Congreso FLÚOR confirma o auxe da IA en mercadotecnia
venres, 26 de maio do 2023
A 5ª
edición do Congreso de
Mercadotecnia FLÚOR concluíu este venres 26 de maio en
Pontevedra cun acordo unánime de que a Intelixencia Artificial ten
múltiples aplicacións na mercadotecnia e estas serán cada vez
maiores. O evento tamén xerou un importante debate profesional sobre
o uso responsábel destas ferramentas intelixentes. Por outra banda,
FLÚOR rematou cunha cifra marca de participación, con máis de 500
participantes presenciais. As temáticas principais desta edición
foron a Intelixencia Artificial en mercadotecnia, a igualdade en
publicidade e o auxe dos formatos sonoros online (música,
podcasts, radios, etc.). O evento, de 2 días de duración e
organizado polo Clúster de Comunicación de Galicia, sumou en total
10 conferencias, 4 mesas redondas e 4 obradoiros prácticos.
Óscar
de Castro, director global de Comunicación de Pull&Bear, animou
ás marcas a crear contidos propios de comunicación, especialmente
se “é contido xerado polos propios consumidores, para estar máis
preto da audiencia e conectar con ela”.
José
Cabanas, CMO de Hijos de Rivera, animou aos estrategos de
mercadotecnia a reflexionar sobre onde queren que estean as marcas e
“a prepararase para o futuro ante os desafíos da IA, a
personalización e a privacidade dos datos”.
Pola
súa banda, Sara Vega, directora de Mercadotecnia de Fnac, explicou
que “todo o que fai unha marca é branding, e o branding
é valor para a empresa, necesario para competir. O branding
impregna todas as áreas de negocio da compañía e tense que adaptar
a cada país e a cada área: produto empregado, experiencia en punto
de venda, todo”, explicou Sara Vega.
Alejandra
Chacón, directora de Estratexia en Havas Media, falou de que “as
mulleres en publicidade queren un co-protagonismo compartido. Pasamos
dunha publicidade que estereotipaba moito (sexista, muller cociña,
limpeza, coidado) a un terreo do politicamente correcto e o seguinte
paso que se demanda é a naturalidade e que estea máis preto da
realidade o que facemos, que é o máis difícil”, afirmou.
O
auxe do sonoro en liña
Outra
gran tendencia que se destacou en FLÚOR foi o boom do audio
online (podcast, música, radio) con tres dos seus grandes
protagonistas. Por unha banda unha plataforma líder mundial, como
Spotify; en segundo lugar un grupo de medios, como Prisa, creador de
plataformas como Podium Podcast e outras; e en terceiro lugar
Audiomotion, consultora especializada en publicidade en audio
dixital. Moderou Alfonso Boullosa, delegado na zona noroeste de
Avante Evolumedia, e participaron Rodrigo González, director
comercial de Spotify España; Rocío Echevarría, directora de
negocio de Prisa Audio; e Álex Medina, director xeneral adxunto de
Audioemotion.
Rodrigo
González de Spotify sinalou que “o vínculo e o engagement é
moito máis amplo cando a experiencia é personalizada e inmersiva, e
no audio o recordo é 5 veces superior que noutros medios de
comunicación”.
Rocío
Echevarría destacou que “o podcast é un produto de nicho: non se
tratar de ter grandes audiencia, senón audiencias de calidade; e o
móbil fixo que o audio se movese moito máis, fainos chegar a
calquera”.
Álex
Medina sinalou que a pesar deste auxe, aínda hai unha “falta de
investimento por parte das marcas para seguir desenvolvendo
tecnoloxía, hai un gap entre o consumo e a publicidade neste
medio”.
Sobre
o futuro empresarial deste ámbito, Rodrigo González explicou: “En
Spotify cremos no modelo freemium; de feito o 70% de consumo
de podcast fano consumidores premium”.
Álex
Medina prognosticou: “A oferta é moi grande polo que a publicidade
deberá ser cada vez máis personalizada e adaptada ao oínte”. Os
relatores coincidiron no medre e no potencial deste medio, e
sinalaron a importancia das métricas. “Como industria debemos
traballar conxuntamente para ter un sistema de medición
estandarizado”, afirmou Rocío Echevarría.
Máis
mesas redondas
Doutra
banda, tamén se celebrou en FLÚOR a mesa Tiktokers Galicia: como
arrasar en Tiktok desde este recuncho do mundo, que foi moderada
por José Casás da axencia Picnic Ideas Felices, e os relatores
foron Carlos Amado, coordinador de novos formatos dixitais en TVG e
coordinador de Dígocho Eu; Esther Estévez, presentadora de Dígocho
Eu, e Paula @blondiemuser, creadora de contido galega de
sustentabilidade e lifestyle.
En
FLÚOR tamén tivo lugar unha mesa redonda sobre mercadotecnia en
centros comerciais, na que participaron Mamen Sánchez, responsábel
de Mercadotecnia en Caleido (Madrid); Lorena Rey, responsábel de
mercadotecnia en C.C. Marineda City (A Coruña) e Carmen Luna,
directora de Mercadotecnia de Ànecblau (Castelldefels, Barcelona).
Estiveron
moderados por Maria Estrada, responsábel de RRPP e comunicación en
Recados Carmen.
A
mesa redonda titulada Omnicanle: exemplos próximos
de estratexias de mercadotecnia foi moderada por
Rubén Bastón, director de Mercadotecnia4eCommerce e participaron
representantes de empresas galegas: Julián Hernández, director de
mercadotecnia de Velgasa-Eroski; Diego Piñeiro, director innovación
en Selmark; e Cris Costa, responsábel de mercadotecnia de Bodegas
Marqués de Vizhoja.
O
congreso estivo organizado polo Clúster de Comunicación de Galicia,
que une a toda a cadea de valor da comunicación de Galicia: empresas
e profesionais de mercadotecnia, de comunicación, deseñadores,
creativos, axencias de publicidade, de medios, impresores, etc.
Forman parte do clúster asociacións profesionais como a asociación
galega MARKEA, a Asociación de Directores de Comunicación DIRCOM
Galicia, a asociación Creatividade Galega ou a asociación de
Organizadores Profesionais de Congresos OPC Galicia.