O 68% da mocidade europea consome películas descargadas da Internet

mércores, 12 de febreiro do 2014 Marcus Fernández

A Comisión Europa vén de publicar un estudo sobre o perfil da audiencia audiovisual actual e futura nos dez principais países da Unión Europea, para o que consultaron a 4.608 cidadáns de entre 4 e 50 anos (considerados como mocidade europea), comprobándose que o consumo de películas maioritario na Unión é na televisión e no cine doméstico e en salas comerciais, mentres que o vídeo baixo demanda aínda está emerxendo.
Aínda que no informe non se fala de descargas ilegais para conseguir unha resposta sincera dos consultados, conclúese que o elevado prezo dos cines e das plataformas legais leva aos cidadáns a recorrer ás descargas a través da Rede na metade dos individuos consultados, aínda que os motivos para descargar un filme poden atender a causas moi diversas como a falta de dispoñibilidade (30%), o retraso nas estreas (27%), a grande fiestra de explotación das películas (28%) e incluso a falta do tempo para acudir a un cine (23%).
O 68% dos consultados a nivel europeo serían habituais das descargas de filmes a través da Internet, e aínda que en España as entidades de xestión de dereitos aseguren que somos o país máis pirata do mundo, só estamos sobre a media comunitaria en descargas (cun 79%), véndonos superados por outros países como Croacia, Polonia ou Lituania (chegando este último ao 87%), mentres que os países con menos descargas serían Alemaña e Reino Unido, polo que podemos concluír que existe unha relación directa entre o poder adquisitivo dos cidadáns e o hábito das descargas (que de todos os xeitos vese con normalidade en todos os mercados).
Sorprende ver no informe como, no consumo de cine doméstico, mentres o DVD está lixeiramente por debaixo das descargas (cun 67%), o Blu-ray ten unha posición bastante mala (20%) a só 2 puntos dun formato considerado obsoleto hai moito tempo, o VHS.

Táboa cos resultados do informe por países

PUBLICIDADE