O Apalpador pide á Xunta que este sexa o derradeiro Nadal sen programación infantil e xuvenil en galego

A Mesa pola Normalización Lingüística celebrou este 22 de decembro, na praza do Obradoiro de Santiago, un acto festivo no que o Apalpador e un grupo de crianzas lle pediron ao presidente da Xunta, Alfonso Rueda, que este sexa "o derradeiro Nadal sen programación infantil e xuvenil en galego". A petición forma parte dunha campaña de mobilización na Rede á que podemos adherirnos a través da web da Mesa.
O Apalpador lamentou este venres en Santiago non poder agasallar as crianzas galegas a Canle Xabarín que lle piden cada ano, debido, dixo, “ao incumprimento da Iniciativa Xabarín que se aprobou por unanimidade no Parlamento galego en maio de 2021, despois de meses sumando o apoio de ducias de colectivos e de máis de 33.000 persoas”. E engadiu: "Mentres non se cumpra o acordo parlamentar promovido pola Mesa, con amplo apoio social, a nenez e a mocidade galegas seguirán sen poder gozar con programación audiovisual na súa lingua, en todos os dispositivos e plataformas de contidos audiovisuais”.
O presidente da asociación en defensa da lingua, Marcos Maceira, recordou que "a programación infantil e xuvenil en galego é apenas o 0,83% da dispoñible nas operadoras de televisión e que a TVG reduciu o espazo reservado a esta programación na segunda canle, mentres que o galego está dispoñible no 0% das emisións na canle temática Clan, de TVE". E engadiu: "É lamentable que haxa que reaxir para se cumprir a lei e os acordos unánimes do Parlamento galego, mais as fobia ao galego de Alfonso Rueda non pode estar por riba da demanda cidadá de que a TVG impulse a oferta en galego para nenos e nenas. Estase a impedir que a infancia e a mocidade galegas teñan unha mínima posibilidade de acceso a contidos audiovisuais televisivos orientados a elas. Para iso, o presidente Rueda non dubida en boicotar directamente unha decisión do Parlamento sobre a TVG". Maceira concluíu sinalando que “os poderes públicos teñen obriga de promoción do galego e as televisións públicas teñen que estar ao servizo da sociedade, tanto a TVG como TVE deben favorecer o acceso das crianzas á súa lingua. Xa abonda de incumprir todos os acordos e leis favorables ao idioma de Galiza".
O acto no Obradoiro rematou cun concerto de Roberto Sobrado.