O Arquivo-Biblioteca da Catedral de Santiago publica un novo catálogo en aberto de mapas, planos e debuxos

O Arquivo-Biblioteca da Catedral de Santiago ofrece en aberto e na Rede un novo instrumento de descrición da súa colección Archivium Sancti Iacobi co número 7. Baixo o título de Catálogo da colección de mapas, planos e debuxos do ACS este libro dixital en formato PDF de 768 páxinas agrupa en 177 asentos numerados completas e actualizadas fichas arquivísticas dos documentos cartográficos e debuxos arquitectónicos e artísticos conservados no noso arquivo e que carecían de sinatura.
Son documentos gráficos e textuais, en gran parte inéditos e noutros moitos casos con novos datos ata o de agora descoñecidos, cunha cronoloxía que abarca desde preto de 1656 ata os anos 80/90 do século pasado, obra de diferentes artistas e dos principais mestres de obra da fábrica e do cabido catedralicios: José Vega y Verdugo, Domingo de Andrade, Simón Rodríguez, Fernando Casas Novoa, Juan Antonio García de Bouzas, Lucas Ferro Caaveiro, Clemente Fernández Sarela, José de Turnes, Domingo Lois Monteagudo, Miguel Ferro Caaveiro, Manuel Antonio Arias Varela, fray Guillermo de Cossío, Juan Antonio Nogueira, Melchor de Prado, Mariano Cantallops, Agustín Trasmonte, José María Lareo, Manuel de Prado, Juan Esmorís, Ramón Constenla, Rafael de la Torre, José Morón, Enrique Mayer, Luis Menéndez Pidal, Francisco Pons-Sorolla, Manuel Chamoso ou o coengo Pío Gil García.