O BNG reclámalle ao Goberno central a cesión a Galicia da xestión da banda ancha
xoves, 7 de xaneiro do 2010
A portavoz en Sociedade da Información e deputada do BNG,
Ana Luísa Bouza, vén de presentar no Parlamento galego unha proposición non de
lei para que se establezan negociacións co Goberno do Estado para a cesión da
banda larga do espectro radioeléctrico á Xunta.
Para a deputada nacionalista, “este é un momento crucial para instar ao Goberno a establecer unha
rede galega na banda de espectro que permita a banda larga en mobilidade no
escenario dunha tecnoloxía 4G”, xa que segundo afirma “coincide o apagamento analóxico co compromiso do Goberno de dar
cobertura ao 100 por cento da poboación en 2011”.
Bouza asegura que o programa PEBA (Extensión de Banda Larga
a zonas rurais illadas) desenvolvido dentro do Plan Avanza, nas súas sucesivas
edicións, “resultou insuficiente para a
resolución deste problema e faise, polo tanto, necesario un cambio de estratexia”.
Asemade, Ana Bouza considera que a solución pasa por
reclamar espectro que permita a fusión da tecnoloxía móbil e a wimax, “para poder implementar tecnoloxía 4G”
que, segundo afirma, “será comercializada
no ano que acabamos de iniciar”.
Para finalizar, a portavoz do BNG cre que esta asignación
daría o servizo desexado aos cidadáns do rural “unindo todas as comarcas e cumprindo así co paradigma de Servizo
Universal”.
