O CCG desenvolve un servizo para achegar a cultura galega ós nosos móbiles

martes, 14 de novembro do 2006 Fernando Sarasketa

Se non podes ir á cultura galega, a cultura galega sae ó teu encontro. Este é (por así dicilo) o alicerce do novo servizo que está a desenvolver o CCG e que trata de tirarlle proveito ás vantaxes das novas tecnoloxías da información, neste caso dos móbiles. Desta maneira, os usuarios da web culturagalega.org e os interesados en xeral no que pode dar de si informativamente falando a nosa terra teñen unha boa oportunidade de estar de xeito permanente actualizados a través do móbil, pudendo consultar o arquivo de novas (8578) do CCG, acceder ó catálogo de libros, banda deseñada e producións audiovisuais ou mesmo ver os vídeos de culturagalegaTV logo de descargalos e (apunta o CCG) con boa calidade.
Este esforzo por achegarnos a posibilidade de levar algo máis no móbil que SMSs de publicidade das operadoras e chamadas non desexadas forma parte dun paquete amplo de servizos tecnolóxicos cos que o CCG defende o uso destas ferramentas como canles idóneas para a difusión do noso, de aí que por exemplo os seus contidos web estean en constante crecemento.
Malia todo, cómpre subliñar que o dito servizo de información do CCG nos móbiles está aínda en proceso de desenvolvemento, e que calquera suxestión dos internautas galegos (supoñemos que sempre e cando sexa construtiva) será ben recibida, e estas poderanse facer a través do teléfono 981 957 219 ou por correo electrónico.

PUBLICIDADE