O CEMI UDC-Navantia xa conta con máis dun centenar de investigadores dando forma ao estaleiro do futuro

luns, 27 de novembro do 2023 S. P.

O Centro Mixto de Investigación UDC-Navantia segue a reunir talento e experiencia. Segundo explica a Universidade da Coruña, o equipo involucrado no programa supera as 100 persoas, 52 da institución educativa e 47 da compañía pública Navantia, ás que habería que engadir outras que se integran nos grupos de traballo a través das subcontratacións necesarias para determinados proxectos. O reto da CEMI é intensificar a hibridación e a interdisciplinariedade dos equipos de traballo, dando continuidade aos logros da súa antecesora, a Unidade Mixa de Investigación (UMI) UDC-Navantia, en materia de colaboración investigadora (o traballo do persoal da UDC e da empresa).
A UDC asignou aos proxectos do CEMI 28 investigadores que forman parte do seu persoal. Deles, a maioría son doutores e doutoras en Física, Enxeñaría Industrial, Enxeñaría Informática ou Enxeñaría Naval e Oceánica e nove son catedráticos de universidade. “Son perfís cunha longa traxectoria no ámbito tecnolóxico e científico, que suman máis de 800 artigos publicados en revistas científicas e que participaron ou dirixiron máis de 400 proxectos de investigación”, explica a UDC, engadindo que a estes 28 investigadores sénior engádense outras 27 persoas contratadas pola Universidade a tempo completo, con perfís correspondentes a mestrado en enxeñaría, enxeñaría técnica, grao en enxeñaría ou grao ou licenciatura en ciencias aplicadas. Deles, a metade son novas incorporacións e a outra metade continúan en postos creados no marco da anterior UMI.
Pola súa banda, Navantia asignou 47 persoas aos diferentes proxectos de investigación que está a desenvolver o CEMI. Catro delas dedícanlles o 51% da súa xornada de traballo, mentres que o resto destina entre un 5% e un 15% da mesma a tarefas que abranguen diversos ámbitos como o control de calidade, o apoio ao ciclo de vida, a rastrexabilidade, o control estatístico de procesos, inspección ou laboratorio, entre outros.
Os perfís de Navantia corresponden tamén a persoas cunha alta cualificación. Titulados e tituladas en Ciencias Químicas, Enxeñaría Naval e Oceánica, Deseño Industrial, Enxeñaría Técnica Naval, Enxeñaría Técnica Industrial en Electrónica, en Mecánica, Enxeñaría de Camiños, Automática ou Telecomunicacións. No equipo hai tamén un doutor enxeñeiro industrial. En conxunto, o persoal que a empresa pública imputou ao programa do CEMI suma máis de 700 anos de experiencia na compañía pública en áreas de alta especialización.

PUBLICIDADE