O CESGA achega cálculo para acadar menos emisións de CO2 do gando vacún

luns, 15 de outubro do 2018 Fernando Sarasketa

O Centro de Supercomputación de Galicia está a abrir importantes vertentes de traballo no ámbito green, máis polo miúdo na biotecnoloxía relacionada cos sectores primarios. Un dos proxectos medio ambientais máis destacados nos que coopera consiste en reducir con cálculo de alto rendemento as emisións de CO2 emitidas polo gando vacún, unha grave problema ambiental que acrecenta, xunto coa actividade humana, o catastrófico quecemento global (hoxe en día un 12% da enerxía consumida polas vacas a través da súa alimentación regresa á atmosfera con feitura de metano; e ademais, consumir un quilo de carne de vaca equivale a realizar unha viaxe de 50 quilómetros en coche). O CESGA está a contribuír a este proxecto coa capacidade e o tempo de cálculo precisos.
O proxecto vén da man do Instituto Nacional de Investigación e Tecnoloxía Agraria e Alimentaria (INIA) e insírese no seu obxectivo de mellorar a xenética do vacún para diminuír as emisións e “contribuír a unha produción de leite e de carne máis sustentábel”. Con este fin, analízase o xenoma e o metaxenoma de 500 animais da Cornixa Cantábrica e do Levante, poñendo o foco na raza Holstein (coñecida como frisona). O proxecto comezou en 2017 e prevese que culmine en 2020. Ten dúas frontes principais de actuación: por unha banda optimizar as fontes de alimentación con materias primas que na dixestión deixen menos hidróxeno libre, e pola outra, seleccionar daquelas familias que durante o proceso dixestivo produzan menos metano no rume. Ou sexa, búscanse animais que aproveiten mellor a enerxía que consumen.
O equipo do INIA centrado no proxecto (integrado por unha ducia de investigadores, persoal de laboratorio, técnicos e estudantes) está traballando para obter o xenoma e o metaxenoma de medio milleiro de vacas da Cornixa Cantábrica e Levante. Avaliar a fondo as características do ADN posibilitará, nas súas palabras, “identificar os animais da poboación cunha maior eficiencia dixestiva”. O traballo ten unha fase de xenotipado do sangue e, a partir de aí, ábrense unha chea de posicións de marcadores xenéticos, dos que é posíbel adiviñar até 650.000 empregando técnicas estatísticas. O labor despregado chega até os detalles máis miúdos: leva aos investigadores ao coñecemento de rexións do ADN que subministran pautas a apetencia dun animal, a predisposición xenética a comer máis ou menos, etc.
Como dixemos, o papel do Centro de Supercomputación de Galicia (CESGA) no proxecto consiste basicamente en achegar ao INIA as “altas necesidades de memoria RAM e o tempo de cálculo” precisos para conseguir os obxectivos marcados. Cómpre ter en conta que os investigadores involucrados neste traballo empregan grandes bases de datos xenómicos procedentes de xenotipado e secuenciado completos, tanto dos animais como das súas microbiotas, información que logo debe almacenarse, xunto con todos os arquivos e resultados intermedios e finais do procesamento das secuencias. No 2017 usáronse máis de 500 gigabytes pero a previsión é de que esta cifra medre de maneira exponencial e se multiplique por cen.
O ano pasado, os investigadores empregaron máis de 16.000 horas de supercomputación.
A investigación do INIA pretende solucionar unha das principais preocupacións dos gandeiros, que contarán con máis información xenética para as súas decisións na reprodución da especie, ademais de contribuír ao uso de menos recursos na alimentación vacúa e a unha produción máis sustentábel no conxunto do sector.

PUBLICIDADE