O CESGA participa nun programa de pesca galega sustentábel con máis de 250 investigadores
mércores, 27 de xullo do 2022
Este
27 de xullo presentouse unha iniciativa de investigación para un
meirande desenvolvemento sustentábel das actividades vencelladas ao
mar. Trátase
do Prtograma de Ciencias Mariñas de Galicia, que xorde do traballo
en rede de máis de 250 investigadores. Na presentación
participou a conselleira do Mar, Rosa Quintana, quen puxo este plan
como exemplo da colaboración entre os distintos centros galegos a
prol da riqueza produtiva e medio ambiental mantida no tempo.
Esta
iniciativa -financiada ao amparo do Mecanismo de Recuperación e
Resiliencia dos Fondos Next Generation Europe- conta coa
participación de preto de 90 grupos de investigación pertencentes
ás institucións galegas máis punteiras entre as que se atopan seis
centros de investigación dependentes da Xunta (Centro de
Supercomputación de Galicia, CETMAR, CIMA, IGAFA, INTECMAR e
Meteogalicia), as tres universidades públicas galegas e catro
centros dependentes do Consello Superior de Investigacións
Científicas (CSIC).
Nun
plano concreto, este proxecto busca “dar solución ás necesidades
máis inmediatas do sector mariño galego mediante o desenvolvemento
das tecnoloxías mariñas e a dixitalización, así como a educación
ambiental, ao tempo que trata de fortalecer as sinerxías entre os
axentes de investigación e o tecido empresarial para afrontar os
retos futuros da pesca e a acuicultura, o turismo costeiro e mariño
ou a economía azul”.
A
titular de Mar salientou que esta acción “permitirá acadar un
modelo integrado de xestión do fluxo de coñecemento científico en
ciencias mariñas adaptado ao contexto ambiental, sociocultural,
económico e institucional de Galicia”. Tamén fixo saber que entre
os tres grandes retos do programa atópase o de “desenvolver unha
estratexia de gobernanza permanente da observación e monitoraxe do
ecosistema mariño en todas as súas dimensións, o que permitirá
obter a información necesaria para garantir un aproveitamento máis
sustentábel dos seus recursos”. Ao abeiro deste desafío, a
comunidade desenvolverá ferramentas e tecnoloxías innovadoras para
construír unha plataforma de datos integrada no Centro de
Supercomputación Galego, o CESGA.
O
plan tamén pretende potenciar “unha produción acuícola
sustentábel” mediante a mellora da investigación xenómica,
desenvolver ferramentas para o abastecemento estábel de semente na
acuicultura de moluscos bivalvos, mellorar a prevención e control de
patoloxías e xerar novos sistemas de cultivo sustentábel baseados
na acuicultura multitrófica.
O
terceiro obxectivo é a transformación social e económica e a
transferencia, a capacitación e a capitalización do coñecemento
cara “a unha auténtica economía azul sustentábel”. Abordarase
mediante unha investigación multidisciplinar no eido das ciencias
sociais que inclúa ramas como a física, a química, a xeoloxía ou
a bioloxía, entre outras.
A
titular de Mar, que estivo acompañada por distintos responsables da
Consellería, salientou que se trata dun programa pioneiro en España
co que “se aglutina a experiencia da comunidade científica e os
intereses e necesidades da industria do mar”. Ao longo desta mañá
distintos expertos exporán as liñas de traballo que prevé o
programa e a xornada será clausurada pola directora da Axencia
Galega de Innovación (GAIN), Patricia Argerey.