O CESGA súmase á Rede Española de Supercomputación
mércores, 29 de abril do 2015
O Centro de
Supercomputación de Galicia (CESGA)
anunciou hoxe a súa incorporación á Rede Española de
Supercomputación (RES). Así o deron a coñecer o presidente e o
director do centro galego, Manuel Varela e Javier García Tobío,
quen
participaron na primeira xuntanza do Consello da Rede Española de
Supercomputación (RES). A esta rede, informouse, incorporáronse
cinco novos nodos, entre eles o supercomputador Finis Terrae II do
CESGA, por certo un dos piares na constitución desta nova RES
actualizada.
No encontro deste
mércores aprobouse tamén a posta en marcha dun acordo
“multilateral” para optimizar a operatividade da RES, en palabras
dos seus responsábeis “un acordo fundamental para a coordinación
da supercomputación en España, elemento clave no desenvolvemento
científico e tecnolóxico”.
Lembrar que a Rede
Española de Supercomputación é unha infraestrutura distribuída
que naceu en 2007 para dar soporte ás necesidades de cálculo
avanzado dos diferentes grupos de investigación, e o seu obxectivo
fundamental é dar servizo á comunidade científica.
Como membro desta nova
RES ampliada, o CESGA manterá o seu recoñecemento como Instalación
Científico Tecnolóxica Singular de España (ICTS), “unha vantaxe
clave que lle proporcionará acceso a axudas específicas do
Ministerio de Economía e Competitividade”, sinalan fontes do
centro galego, que tamén lembran que xunto coa incorporación do
Finis Terrae II, no Consello da RES aprobouse tamén a incorporación
como nodos da mesma do Pirineus, do Consorcio de Servizos
Universitarios de Cataluña (CSUC); Lusitania, da Fundación
Computación e Tecnoloxías Avanzadas de Estremadura; Caléndula, do
Centro de Supercomputación de Castela e León, e Cibeles, da
Universidade Autónoma de Madrid.