O CESGA xunta en setembro aos expertos en computación avanzada da rede RES
martes, 18 de xullo do 2017
Santiago de Compostela
vai dar acubillo este ano á
nova Xornada de Usuarios da Rede Española de Supercomputación
(RES), na súa edición número 11. Trátase dun encontro
referencial no ámbito da investigación en novas metodoloxías de
cálculo e computación de alto rendemento, de gran interese non só
para os integrantes da RES e os seus usuarios (actuais e potenciais),
senón tamén para a puxante comunidade de estudantes e
investigadores en computación avanzada e, igualmente, para as
empresas (cada vez máis) que precisan para os seus procedementos de
potentes recursos de cálculo, predición e simulación. A xornada da
RES celébrase o 28 de setembro e compleméntase, ao día seguinte e
tamén en Compostela, coa sexta Conferencia do HPC Advisory Council.
As dúas citas veñen da man do Centro
de Supercomputación de Galicia (CESGA).
Polo que respecta ao
encontro da RES, é unha xuntanza anual de usuarios para informar das
novidades da RES e achegar información de interese sobre os métodos
de acceso aos recursos da RES e de PRACE (Partnership for Advanced
Computing in Europe). Esta xornada, en palabras da organización,
é “un espazo de encontro para todos os usuarios, os técnicos de
apoio, o comité de acceso e o comité de usuarios”. Ademais,
acubillará sesións científicas paralelas e unha sesión de
pósteres para dar difusión dos resultados máis relevantes dos
proxectos de investigación de usuarios. O organizador local da
xornada é, como dixemos, a Fundación Pública Galega Centro
Tecnolóxico de Supercomputación de Galicia (CESGA)
Polo que atinxe á sexta
Reunión do HPC Advisory Council, ten como finalidade promover a
interacción entre as empresas e organizacións que traballan en
tecnoloxías HPC (computación de alto rendemento polas súas siglas
en inglés) cos usuarios finais, e abrangue un amplo rango de
intereses e temáticas como Deep Learning, Machine Learning
(aprendizaxe das máquinas) e Big Data (información a gran escala).
O día 28 de setembro
pola tarde, despois da Xornada de Usuarios, desenvolverase unha
actividade cultural que consistirá nunha visita guiada polo centro
histórico de Santiago de Compostela, “para favorecer o
networking entre todos os asistentes”.