O CITIC contribúe a dotar de competencias dixitais aos titulares de edificios históricos en Europa
martes, 27 de xullo do 2021
Achegar
un sólido alicerce tecnolóxico ao ámbito do patrimonio privado dos
nosos centros históricos é un dos grandes obxectivos do
proxecto HERIT, do que forma parte (xunto con sete entidades
europeas) un grupo de investigadores do CITIC dirixidos por Laura
Nieto Riveiro, xunto co CUFIE e o Grupo de Estudos Territoriais (GET)
da Universidade da Coruña UDC.
En
concreto, HERIT (Heritage Efficient management through Relevant IT
use) é un proxecto financiado polo programa Erasmus+ e ten como
obxectivo “apoiar e impulsar a preparación en materia de educación
dixital dos propietarios de casas históricas, axudándolles a facer
fronte ao impacto da situación derivada da pandemia do COVID-19 no
turismo cultural, así como potenciar a importancia das casas
históricas de propiedade privada e a súa crucial contribución ao
patrimonio cultural europeo”.
Segundo
informa o CITIC, o elemento central de HERIT é a creación dun curso
en liña masivo e aberto (MOOC) destinado especificamente ás/aos
titulares de casas históricas. As principais finalidades do curso
son achegarlles habilidades e coñecementos axeitados para manter os
seus edificios históricos en materia de desenvolvemento empresarial,
competencias dixitais, marco normativo e xurídico…., así como
mellorar a súa experiencia no uso de ferramentas dixitais.
O
pasado mes de xuño tiveron lugar as reunións de inicio do proxecto,
que terá unha duración de 24 meses.