O CITIC da UDC lidera un proxecto europeo para protexer o medio ambiente e mellorar a saúde

Un novo proxecto, coordinado por María González Taboada, investigadora do CITIC da UDC, centro da Rede CIGUS da Xunta de Galicia, busca desenvolver novas estratexias numéricas para entender e predicir como se comportan os fluídos non newtonianos en materiais porosos, como rochas ou tecidos biolóxicos.
Dende o CITIC explican que este tipo de fluídos, que inclúe desde mesturas viscoelásticas ata fluídos con propiedades que cambian co tempo, “resulta difícil de estudar, pero a súa análise é fundamental para múltiples campos científicos e industriais”.
O CITIC engade que os avances que achega o proxecto InNoPor, do programa Marie Skłodowska-Curie Actions (MSCA), “serán clave para optimizar procesos enerxéticos, mellorar técnicas de remediación ambiental (é dicir, as accións destinadas a limpar e restaurar lugares contaminados para protexer a saúde e a contorna) e anticipar fenómenos naturais como a dispersión de cinza volcánica ou o fluxo de coadas de lava”.
Ademais, o proxecto terá impacto en aplicacións biomédicas, por exemplo, na administración eficiente de medicamentos en tecidos complexos.
O consorcio internacional, formado por oito institucións de Europa e América, traballará en conxunto durante os próximos anos para deseñar modelos matemáticos e algoritmos máis precisos e robustos.
Desenvolverase un software de código aberto que integrará estes avances e validarase con datos reais, como os fluxos de lava ocorridos na Palma en 2021.
Así mesmo, o proxecto contempla estudar fenómenos que involucran múltiples fases e efectos térmicos, o que abrirá a porta a aplicacións aínda máis complexas.
As entidades que participan neste proxecto son a University of Strathclyde (UK), RWTH Aachen (Alemaña), Kiel University (Alemaña), WIAS Berlin (Alemaña), IGME-CSIC (España), Universidade de Concepción (Chile) e Universidade do Bio-Bio (Chile).