O CITIC mostra ao Consello Social da UDC o seu importante labor en investigación e transferencia
venres, 27 de abril do 2018
O
Centro de Investigación TIC
(CITIC) da Universidade da Coruña celebrou onte unha xornada de
portas abertas cos integrantes do Consello Social da UDC. O obxectivo
da xuntanza? Pois que os membros do consello tivesen oportunidade de
coñecer de primeira man o traballo do devandito centro no ámbito
das Tecnoloxías da Información e da Comunicación (TIC), os
proxectos levados a cabo polos seus investigadores e a súa aposta
pola transferencia do coñecemento. En termos máis concretos, a
comunidade do Consello Social puido dar conta (entre outras cousas)
dos detalles de SmartDrones, proxecto para a creación de vehículos
aéreos tripulados e intelixentes, impulsado pola firma Avansig, como
lembraremos creada por investigadores ligados ao CITIC.
Na
cita participaron o reitor da Universidade da Coruña, Julio Abalde e
o director do CITIC, Manuel F. Penedo, quen foron os encargados de
recibir aos membros do Consello Social.
O
reitor salientou o papel do CITIC “como centro de referencia da UDC
que aposta pola transferencia do coñecemento e por terse convertido,
grazas aos seus investigadores, non único centro de Galicia
recoñecido como Centro Singular de Investigación”.
Pola
súa banda, o director de CITIC puxo o foco “na posta en marcha do
CITIC como resposta ás demandas dos investigadores, un centro que
hoxe en día conta con doce grupos de investigación, nove deles de
máxima categoría”. Segundo indicou, esta ducia de grupos ten o
nexo común de “fomentar fomentan a relación coas empresas” e de
apostar pola liberdade e autonomía dos seus membros para o
desenvolvemento e organización das súas actividades. Froito disto e
do avanzado coñecemento das/os integrantes, explicou, “tivemos
moitas experiencias de spin-off e a maioría delas con éxito”.
Pola
súa parte, o vicerreitor de Política Científica, Investigación e
Transferencia, Salvador Naya, sinalou que “a Universidade da
Coruña ten grupos de investigación que se agrupan en centros como
ou CITIC, estratéxicos para a UDC e moi competitivos”.
Os
membros do Consello Social realizaron unha visita guiada polas
instalacións do CITIC, que incluíu a demostración dun voo autónomo
dun dron, un aparello dos denominados SmartDrones, a liña de
vehículos aéreos non tripulados e intelixentes desenvolvida por
Avansing. Ademais, os integrantes do Consello puideron coñecer o
traballo desenvolvido por diferentes centros de investigación,
ademais do CITIC, e pertencentes á UDC. O coordinador do Centro de
Innovación Tecnolóxica en Edificación e Enxeñería Civil da
Universidade da Coruña (CITEEC), Juan Ramón Rabuñal, destacou o
papel do centro no eido da enxeñaría civil: “Temos cinco grandes
laboratorios para desenvolver modelos a escala de infraestruturas, e
outros cinco máis pequenos”. Pola súa banda, o coordinador do
Centro de Investigacións Científicas Avanzadas (CICA), Jaime
Rodríguez, sinalou que este departamento é o irmán pequeno dos
centros tecnolóxicos, con cinco grupos de investigación
biotecnológica, seis relacionados co medio ambiente e tres de
ciencia de materiais.