O CITIC mostra proxectos ante empresas de Asia e Latinoamérica

xoves, 29 de novembro do 2018 Redacción

O Centro de Investigación TIC da Universidade da Coruña luciu esta semana, ante representantes de diversos países, innovación e capacidade de resposta tecnolóxica ante retos diversos. Máis polo miúdo, os achados e proxectos do CITIC presentáronse ante empresas de Latinoamérica e Asia. Foi no transcurso dunha actividade (unha misión comercial inversa) que veu da man do Clúster TIC Galicia e na que participou o responsábel de Transferencia Tecnolóxica e Innovación do CITIC, Manuel Bustabad. Na cita coas empresas foráneas, Bustabad presentou as capacidades do CITIC e as súas principais liñas de actividade en I+D+i.
Nesta ocasión participaron empresas procedentes de Cuba, México e Xapón co obxectivo de coñecer de primeira man as posibilidades de negocio no sector TIC galego. Desde Cuba acudiu Radiocuba, empresa pertencente ao Ministerio de Comunicacións. De México acudiron as empresas Under Armour, marca de retail deportiva con 22 anos de traxectoria; Miniso, empresa de moda e téxtil que ofrece produtos para o fogar, beleza, moda, tecnoloxía e deportes; e Viva Aerobus, pertencente ao grupo de transporte terrestre IAMSA, o máis grande do país. En representación de Xapón acudiu TV Setouchi, a única estación da rede TX presente na rexión de Chugoku-Shokoku.
O Cluster TIC Galicia organizou esta actividade, co-financiada polo Instituto Galego de Promoción Económica (IGAPE), a Xunta de Galicia e o Fondo Europeo de Desenvolvemento Rexional (FEDER) co obxectivo de fomentar a exportación do sector tecnolóxico galego
Segundo contan os organizadores da misión comercial, nos vindeiros días a actividade devandita completarase con reunións de negocio bilaterais e visitas das organizacións estranxeiras ás sedes dalgunhas das entidades e empresas galegas, para “coñecer o seu potencial innovador e os seus procesos de produción e comercialización”.

PUBLICIDADE