O CITIC puxo A Coruña no epicentro do debate arredor do Big Data

Gema Parreño impartindo unha conferencia no Big Data Coruña 2018

Esta semana A Coruña foi unha palestra de reflexión arredor das novas tendencias en analítica de datos. O motivo? A celebración, por parte de investigadores do CITIC, do evento Big Data Coruña, que chegou á súa cuarta edición (onte e hoxe) xuntando científicos e tecnólogos de primeiro nivel para abordar de múltiples maneiras un dos grandes desafíos do noso tempo: que facer coa información inxente que atesouramos grazas ás novas tecnoloxías da información? E o máis importante: que ferramentas accesíbeis e universais empregar para xerar o máximo proveito (na nosa calidade de vida, na defensa do medio ambiente, no progreso da ciencia) deses datos a gran escala que non cesamos de crear?
O Big Data Coruña 2018 conta coa colaboración do CITIC, a Xunta de Galicia, a Rede Galega de Tecnoloxías Cloud e Big Data para HPC, e a Rede Española de Big Data e Análise de datos escalable.
A organización do evento foi liderada pola investigadora do CITIC, presidenta da Asociación Española para a Intelixencia Artificial e catedrática de Ciencias dá Computación e Intelixencia Artificial da UDC, Amparo Alonso-Betanzos, e o tamén investigador do CITIC, da área de Big Data da University College London e director da área de investigación de Spartan Data, David Martínez. Ambos mostraron a súa satisfacción por conseguir unha “moi boa acollida” nas dúas xornadas do evento coruñés. Desta maneira, desde a organización salientan que acontecementos tecnolóxicos de primeiro nivel coma este son “espazos clave” para dar a coñecer as novas profesións do futuro, profesións para as que existe unha importante demanda de talento.
O Big Data Coruña 2018 contou con científicos e investigadores de referencia internacional, como un top 30 dos mellores científicos en información a gran escala por Innovation Enteprise, Paco Nathan, e a programadora e científica de datos do BBVA Innovation Lab, Gema Parreño. O evento tamén serviu para a presentación das novas firmas innovadoras Inversa, TestCloud e DataSpartan. Ademais, contou coa participación de científicos de institucións de primeiro nivel como Santander UK Technology, Apache Kylin, Recogn AI e Ávoris Reinventing Travel.