O CITIC quere mostrar o talento da nosa mocidade investigadora no Congreso XoveTIC
luns, 18 de xuño do 2018
Á
volta do verán a nosa mocidade investigadora e creativa ten unha
oportunidade para mostrar e adestrar o seu talento. Estamos a falar
do I Congreso XoveTIC, un
encontro convocado co obxectivo de ofrecer unha palestra á xuventude
innovadora galega: unha xanela na que visualizar os seus proxectos,
ideas e propostas e na que sentar os alicerces para meirandes e
mellores colaboracións entre a xente nova e as universidades e os
centros de investigación.
Segundo
informa o Centro de Investigación TIC (CITIC), organizador do
congreso, o que se busca é “construír un espazo para o debate
para contribuír na formación dos investigadores”. A cita será
os días 27 e 28 de setembro. O prazo de inscrición para participar
ficará aberto até o 13 de xullo.
As persoas
interesadas en participar deberán enviar un abstract de
300 palabras a través deste formulario e os traballos presentados
poden ser tanto orixinais como presentados previamente noutros foros.
Logo, os traballos seleccionados deberán ser remitidos completos
seguindo as especificacións do Templates for computer
transaction.
Ademais
das comunicacións das/os investigadoras/es, que abranguerán boa
parte do programa de actividades (presentacións breves duns 10
minutos de extensión), haberá conferencias plenarias a cargo de
persoeiros relevantes no ámbito do TIC a nivel estatal e
internacional. Tamén haberá sesións de traballo en rede,
obradoiros e exposición de pósteres, ao remate de cada xornada.
Colaboran na organización o CiTIUS da USC e o centro AtlantTIC da
UVigo.