O CITIC volve cos seus Almorzos TIC Talk da man de María Delfina Ramos Vidal e Giovanni Bonisoli

venres, 3 de novembro do 2023 S. P.

O pasado martes, 31 de outubro, o CITIC (Centro de Investigación en Tecnoloxías da Información e as Comunicacións) retomaba ás 10 horas os seus Almorzos TIC Talk logo do verán. Este encontro desenvólvese mensualmente na Sala Cloud do CITIC e reune ao persoal investigador do centro co obxectivo de dar a coñecer os seus traballos e promover a comunicación entre os participantes e o público asistente.
Os Almorzos TIC Talk van xa pola décimo quinta sesión, desta volta moderada polo investigador e membro da Comisión de Formación Álvaro Leitao. O primeiro relatorio tiña como protagonista a María Delfina Ramos Vidal, quen presentou Evolución de liñas de produto software e bibliotecas dixitais, na que explicou as vías para reutilizar produtos de software de xeito máis eficiente. Desta maneira pódense reducir os custos de produción e o tempo de comercialización dos produtos, entre outros beneficios. María Delfina Ramos é investigadora do CITIC e profesora contratada predoutoral na UDC. Está especializada na área de Linguaxes e Sistemas Informáticos.
O segundo faladoiro impartiuno Giovanni Bonisoli baixo o título Event Extraction from Web Data Streams, investigación en procesamento de linguaxe natural (PlN) sobre os avances na extracción automática de eventos en novas de sucesos en xornais. Giovanni é estudante de doutoramento na Universidade de Módena e Reggio Emilia e, arestora, atópase realizando unha estadía na Universidade da Coruña.

PUBLICIDADE