O CNTG acolleu a xuntanza galega de Lanzadeiras de Emprego
martes, 27 de xuño do 2017
As
Lanzadeiras
de Emprego galegas (as palestras da Coruña, Carballo, Ferrol, Lalín,
Lugo, Pontevedra e Santiago) participaron este luns nun encontro
autonómico no Centro de Novas Tecnoloxías de Galicia (CNTG). Na
cita participaron o conselleiro de Economía, Francisco Conde; a
responsábel de Comunicación das Lanzadeiras, Soraya de las Sías; e
o director de Relacións Institucionais de Fundación Telefónica,
Joan Cruz. Na xuntanza lembrouse que a nova edición das lanzadeiras
galegas comezou a funcionar o mes de maio, impulsadas pola Fundación
Santa María A Real, a Fundación Telefónica e a Xunta como “unha
nova estratexia de loita contra o paro”. As sete palestras,
integradas por 140 persoas desempregadas (homes e mulleres con idades
comprendidas entre os 20 e os 54 anos, con diferentes niveis
formativos e traxectorias laborais), teñen unha marcada vertente
tecnolóxico-dixital. De feito, un dos obxectivos da iniciativa é
mostrar
aos participantes como tirar o máximo proveito das redes sociais e
das TIC para atopar emprego.
O
conselleiro de Economía, Emprego e Industria, Francisco Conde,
salientou “a importancia de acompañar a quen estea a buscar
emprego a través de asesoramento co obxectivo de relanzar o seu
perfil profesional”. Ao fío disto, sinalou que, grazas á segunda
convocatoria das Lanzadeiras de Emprego, “os 140 participantes
accederán ás ferramentas necesarias para pór en valor o seu
currículo profesional e para crear unha marca persoal coa que
presentarse con máis garantías de éxito a unha oferta laboral”.
Logo
de superar a primeira fase formativa de maneira satisfactoria
(incluíndo adestramento en comunicación e entrevistas laborais), os
participantes nas Lanzadeiras encaran agora un novo treito do camiño
introducíndose en recursos “diferenciais e proactivos” para a
procura de traballo. Máis polo miúdo, formaranse en cousas como a
elaboración e consulta de mapas de empregabilidade ou nos diferentes
recursos para visualizar currículos e ampliar redes de contacto.