O CPEIG e AMTEGA inauguran este martes o Curso Superior de Administración Electrónica 2021

luns, 13 de setembro do 2021 S. P.

JPEG - 84.4 KB
Fernando Suárez, presidente do Colexio Profesional de Enxeñaría en Informática de Galicia

O Colexio Profesional de Enxeñaría en Informática de Galicia (CPEIG) e a Axencia para a Modernización Tecnolóxica de Galicia (AMTEGA) inauguran este martes 14 de setembro o Curso Superior de Administración Electrónica, impulsado por ámbalas entidades. Contarase coa presenza de Fernando Suárez, presidente do CPEIG, Mar Pereira, directora de AMTEGA, e Sonia Rodríguez-Campos, directora da Escola Galega da Administración Pública (EGAP). Tamén participará na primeira xornada de actividades Miguel Ángel Amutio, director da División de Planificación e Coordinación de Ciberseguridade do Ministerio de Política Territorial e Función Pública, quen ofrecerá un relatorio maxistral, baixo o epígrafe Presente e futuro da Administración Electrónica. A cita será no salón de actos da EGAP, en Santiago, a partir das 11.00 horas.

JPEG - 82.3 KB
Miguel Ángel Amutio ofrecerá un relatorio mexistral na inauguración do curso

Segundo informan o CPEIG e AMTEGA, esta actividade formativa ten como finalidade afondar, desde unha perspectiva técnico-xurídica e cunha importante parte práctica, na concepción da eAdministración, incidindo na relevancia que ten a súa implantación nos distintos órganos da nosa terra. A dirección académica está a cargo do presidente do CPEIG, Fernando Suárez. Así, os contidos do programa analizarán a dita cuestión desde distintos enfoques “para que o alumnado adquira ou perfeccione os seus coñecementos teóricos e prácticos en informática e en dereito”.
Este curso superior, que servirá para dar formación a 50 empregados públicos, desenvolverase do 14 de setembro ao 26 de outubro. Cun total de 114 horas lectivas, impartirase na modalidade semipresencial, con 30 horas de prácticas presenciais en Santiago de Compostela os días 14, 21 e 28 de setembro e 5, 19 e 26 de outubro, en horario de 11:00 a 14:00 e de 16:00 a 19:00 horas, e 84 horas de teleformación.

PUBLICIDADE