O CPEIG e o CESGA lanzan concurso de memes para celebrar ao grande o Día das Rapazas nas TIC
martes, 24 de abril do 2018
Xa vai quedando menos para a
celebración, este 26 de abril, do Día
Internacional das Rapazas nas TIC, un acontecemento para
inverter a cada vez menor concorrencia das mozas nos estudos ligados
ás novas tecnoloxías e, tamén, para
mostrar o gran
traballo despregado polas mulleres no
progreso científico-tecnolóxico. Como
lembraremos, a nivel galego é o Centro Supercomputación de Galicia
(CESGA), en colaboración co Colexio
Profesional de Enxeñaría en Informática de Galicia (CPEIG),
quen impulsa e visualiza a dita celebración, dando voz a mulleres
galegas referentes no sector e poñéndoas en contacto cos centros
educativos da nosa terra. Entre as actividades que preparan figura
unha cita (no CESGA e con ramificacións por multiconferencia) con
empresarias e desenvolvedoras do noso eido dixital e, tamén, un
concurso de memes
convocado baixo o epígrafe Rapazas e
Tecnoloxía.
Este
concurso, que se estrea este ano, ten
por obxecto “provocar a reflexión sobre o papel activo das rapazas
e as mulleres no mundo tecnolóxico cunha linguaxe nova e divertida”,
segundo
informan o CESGA e o CPEIG, que engaden que na actividade poderán
participar rapazas
e rapaces
nadas/os
ou residentes en Galicia de entre 10 e 18 anos. O
seu traballo consistirá no emprego dunha
imaxe, un
debuxo ou de
fotografía orixinais (agás
as que teñan unha natureza abertamente racista, violenta, sexual ou
vexatoria)
para dar forma a unha mensaxe visual reivindicativa e que convide á
reflexión sobre a necesidade de facer igualdade arredor da
tecnoloxía. Os
organizadores explican que o meme
deberá ser feito polas
participantes
e non terse empregado antes, engadindo
que non se
aceptarán traducións ou plaxios doutros
traballos
ou fotos protexidas por dereitos de autor. Cada participante poderá
concorrer
cun máximo de tres creacións.
Nas
bases faise saber que haberá
dous modos de participación, ben a través dunha publicación na
conta de Instagram do
certame,
acompañada do certame
#RapazasNasTIC, ou subir o meme
á páxina de
ICT
Go Girls
indicando o nome e enderezo
de correo de contacto. Os traballos
enviados á
páxina do concurso aparecerán publicados na
conta de Instagram da
área de eLearning do CESGA
e na web do concurso aparecerá unha galería interactiva con todas
as imaxes que participan.
A
actividade dará comezo este día 26 de abril e o prazo para
presentar contribucións rematará o 17 de maio ás 24:00 horas. O
xurado estará composto por cinco persoas, organizadoras do evento
Día das Rapazas nas TIC 2018 e pertencentes ou nomeadas polo CPEIG e
CESGA. O resultado será anunciado o día 18 de maio, a través da
propia páxina do concurso, e mediante a conta de Instagram do dito
departamento do CESGA. Haberá un primeiro premio, consistente nun
kit de robótica, e tres accésit que recibirán unha cunca
conmemorativa do Día das Rapazas nas TIC 2018.
Os
actos do 26 de abril
Respecto do programa previsto
na sede do CESGA,
este 26 de abril,
pola mañá (de 11:00 a 12:30 horas) celebrarase como vén sendo
costume un coloquio virtual con varias mulleres emprendedoras
galegas: emprendedoras, investigadoras e tecnólogas no eido das TIC
(Tecnoloxías da Información e a Comunicación), ás que as/os
estudantes que participen dende os seus centros de
secundaria/primaria conectados vía
streaming coas salas do CESGA poderán
facer calquera pregunta sobre os seus campos profesionais ou razóns
persoais que as levaron a traballar no ámbito tecnolóxico-dixital.
As convidadas deste ano son:
· María José Durán. Enxeñeira en Informática e fundadora da tenda
en liña Potingues Verdes.
· Ana Cidre. Experta en desenvolvemento de tecnolóxica,
organizadora de GDG Vigo e fundadora do grupo GalsTech. Ten un grao
en Belas Artes e un máster en negocios e economía internacional. A
día de hoxe é unha desenvolvedora de software especializada en
Angular.
· Susana Rey. Enxeñeira en Telecomunicacións, máster en
Seguridade da Información e responsábel de Seguridade en R.
· Cecilia Grela. Enxeñeira en Informática, máster en Consultoría
en Software Libre e desenvolvedora de programas en múltiples
proxectos de I+D+i (entre outros, o ICT-Go-Girls!), así como
formadora en TIC.
Pola tarde, de 17.00 a 19.00 horas, celebrarase unha xornada de
portas abertas con actividades TIC divertidas para mozas e mozos de
entre 10 a 14 anos: demostracións e obradoiros de impresión 3D,
realidade virtual e aumentada, arte dixital, programación, robótica,
e, por suposto, unha visita guiada ao corazón do CESGA, o
supercomputador Finis Terrae 2.
Para esta actividade cóntase co apoio das seguintes entidades: Xunta
de Galicia (GAIN, Secretaría de Igualdade, Consellería de Educación
e AMTEGA), o Colexio Profesional de Enxeñaría en Informática de
Galicia (CPEIG), a Universidade de Santiago de Compostela (Facultade
de Educación, Oficina de Igualdade de Xénero, Woman Emprende), a
Universidade da Coruña (Facultade de Informática) e GalsTech, o
Grupo de mulleres interesadas en tecnoloxía de Galicia.
O
evento a nivel internacional vén da man da International
Telecommunications Union (ITU).
O
Centro de Supercomputación de Galicia (CESGA) é impulsor do
proxecto europeo ICT-Go-Girls! (promoción do emprendemento das
rapazas de Secundaria a través das TI) xunto co Colexio Profesional
de Enxeñaría en Informática de Galicia (CPEIG).
A iniciativa diríxese ás rapazas dos primeiros anos de Secundaria
para proporcionarlles unha imaxe “máis atractiva do mundo do
emprendemento tecnolóxico” e lograr así unha maior presenza
feminina no eido das TIC.
Amais das ditas entidades, tamén ten
colaborado nas actividades o Concello de Santiago, sumándose deste
xeito a esta fronte común contra a fenda dixital de xénero.
Contra os prexuízos e as ideas preconcibidas
A cita do 26 de abril é unha actividade de gran importancia para o
desenvolvemento da nosa terra no ámbito informático. En concreto,
diríxese a combater tendencias, prexuízos e estereotipos e
incrementar a presenza feminina no ámbito profesional TIC galego,
unha presenza sen a cal (sinxelamente) a sociedade dixital non dará
avanzado nin progresado. A xornada tamén pon de relevo cifras
inadmisíbeis, como por exemplo a que reflicte a porcentaxe
profesional feminina no ámbito da creación de ferramentas e
contidos dixitais, que é só do 9%.