O CPEIG formará parte do comité técnico da III edición do Congreso de Cidades Intelixentes

A terceira edición do Congreso de Cidades Intelixentes (Smart Cities) celebrarase a vindeira primavera (26 e 27 de abril) no Espacio La N@ve do Concello de Madrid e a organización corre a cargo do Grupo Tecma Red e o Foro Sectorial de Cidades Intelixentes, amais de colaborar o Consello Xeral de Colexios Profesionais de Enxeñaría en Informática (CCII, nas súas siglas en castelán). A presenza galega está asegurada coa participación do presidente do Colexio Profesional de Enxeñaría en Informática de Galicia (CPEIG) e (tamén) vicepresidente do CCII, Fernando Suárez, quen formará parte do comité técnico do congreso como experto.
Dentro do comité intégranse representantes de alto nivel das Administracións públicas, colectivos profesionais implicados, asociacións, organizacións e as institucións máis representativas das diferentes temáticas relacionadas coas cidades intelixentes.
Con este congreso quérese promover o intercambio de coñecemento e experiencias sobre as cidades intelixentes en España, co emprego da tecnoloxía e a innovación como ferramentas base do desenvolvemento.
Os interesados en asistir a este encontro poderán coñecer as últimas novidades e aspectos sociais, tecnolóxicos, estratéxicos, económicos e legais, ademais de iniciativas e proxectos innovadores relacionados coas Smart Cities.
Neste III Congreso de Cidades Intelixentes trataranse diversos temas como: innovación social; mobilidade urbana; eficiencia enerxética; xestión medioambiental; habitabilidade e recursos urbanos; xestión intelixente de infraestruturas e servizos públicos; goberno, economía e cidadanía; seguridade e servizos asistenciais ás persoas; destinos turísticos intelixentes ou illas e territorios rurais intelixentes.