O CPEIG premia o emprendemento e as contribucións á computación paralela da coruñesa Appentra
martes, 27 de outubro do 2020
- Manuel Arenaz, co-fundador de Appentra
Prosegue
a chuvia de recoñecementos do Colexio Profesional de Enxeñaría en
Informática de Galicia: a habitual serie de distincións ás nosas
empresas, profesionais, institucións, organizacións e persoas
investigadoras que concede o CPEIG no marco da súa gala anual, a
Noite da Enxeñaría en Informática de Galicia que este 2020 chega á
súa duodécima edición. Segundo puidemos saber, o
Premio Iniciativa Emprendedora irá dar este ano á firma coruñesa
Appentra, pola súa contribución no “desenvolvemento de
ferramentas que axilizan a computación paralela”, amais de polo
seu “espectacular proceso de medre dende o seu nacemento en 2012
como spin-off da Universidade da Coruña”.
Appentra,
empresa global de Deep Tech (empresa baseada nun descubrimento
científico ou innovación de enxeñaría significativa), xurdiu
“cunha predición visionaria, a computación paralela”. O seu
director executivo (CEO) e co-fundador, Manuel Arenaz, engade ao fío
desta tecnoloxía que se trata “dun paradigma de programación
clave para alcanzar rendemento, que anteriormente empregábase case
en exclusiva no nicho dos supercomputadores pero que hoxe en día foi
quen de espallarse a toda a industria do software”.
Sobre
estes alicerces, Appentra creou importantes vantaxes competitivas e
situarse “na primeira liña do espazo informático da computación
paralela para programar o hardware moderno coa creación do suite de
ferramentas Parallelware”, salienta o CPEIG, facendo fincapé nas
posibilidades que esta suite abre para desenvolver software paralelo
do xeito máis rápido, eficaz e eficiente posíbel, “garantindo as
mellores prácticas de programación e facilitando un mellor uso do
hardware de computación en paralelo”. O colexio tamén enxalza a
capacidade de de Appentra para construír, en colaboración con
expertos en programación multinúcleo e GPU, un catálogo aberto de
boas prácticas de defectos e recomendacións para a programación
paralela co fin de establecer as mellores prácticas nesta disciplina
de desenvolvemento de software.
“A
tecnoloxía Parallelware de Appentra axuda a acelerar o tempo de
execución do software, reducindo o esforzo de desenvolvemento e
procurando a detección e xeración de código paralelo sen erros,
para Intelixencia Artificial, Internet das Cousas, Big Data e
Edge Computing”, explica Arenaz, lembrando que a tecnoloxía
Parallelware foi concibida e deseñada en Europa aproveitando os
resultados de máis de dez anos de investigación na UDC e que xa lle
permitiu á compañía obter clientes de referencia en EE UU, Arabia
Saudita e Europa. Así mesmo, puido establecer colaboracións
estratéxicas con centros académicos e gobernamentais de referencia
como ORNL (EE UU), JSC (Alemaña) e BSC (España), e materializar
alianzas con empresas multinacionais de prestixio para vender estas
ferramentas Parallelware a escala mundial.
Appentra
conseguiu neste tempo un total de dezasete recoñecementos nacionais
e internacionais, como o premio na categoría Ciencia Innovadora
no Innovation Radar Prize 2020 da Comisión Europea, finalista no
Top 100 da competición Santander X Global Award (2020), finalista no
South Summit Startup Competition 2019 na categoría Cutting
Edge Technologies, e seleccionada Emerging Technology nos
eventos Supercomputing SC18 e SC16, o máis importante a nivel
mundial de computación de alto rendemento (High Performance
Computing) que se celebra anualmente en Estados Unidos.
A
gala das informáticas e informáticos da nosa terra, en novembro
A
que en palabras do colexio é “a gala máis importante da
informática en Galicia” celebrarase o finalmente o vindeiro 27 de
novembro (*cambio na data inicial do 30 de outubro polas novas
restricións*) no Hotel OCA Puerta del Camino de Santiago de
Compostela, este ano cun encontro presencial e virtual que reunirá
ás empresas máis destacadas do sector TIC en Galicia. Os premios da
Noite corresponden a dez categorías onde os colexiados e colexiadas
recoñecen as iniciativas ou persoas destacadas no ámbito da
Enxeñaría en Informática.